Елордалық дәрігер 17 балаға ота жасады

Нұр-Сұлтан қаласынан келген жоғары санатты дәрігер Ағабек Чикинаев Маңғыстау облыстық көпсалалы балалар ауруханасында түрлі диагнозы бар 17 балаға ота жасады, - деп хабарлайды mangystaumedia.kz сайты.

Дәрігер 17 отадан бөлек 40 балаға ақысыз кеңес берді.

«Ақтау қаласына бірінші рет келуім. Үш күн ішінде балалар ауруханасының мамандарына өз тәжірибеммен бөлістім. Аяқ, қол, церебралды сал ауруы сияқты патологиясы бар баланың көп екендігін жасырмауымыз керек. Бүгінгі күні ең ауыр формасы бар науқас көп кездеседі. Жалпы кез-келген аурудың алдын-алу маңызды. Ол үшін дәрігерге уақытында хабарласқан жөн. Ал аймақтағы ауруханаға келетін болсақ, қажетті жабдықтар да, білікті мамандар да бар екен. Жалпы біз аймақтарға жиі баруға тырысамыз, өйткені кішкентай науқастарға хирургиялық отаны тегін жасау мүмкіндігі туады. Біз өз тәжірибемізбен бөлісуге әрдайым дайынбыз», - деді N2 көпбейінді балалар ауруханасының ортопедия және оңалту бөлімінің меңгерушісі, медицина ғылымдарының кандидаты Ағабек Чикинаев.

Оның айтуынша, жылына 17% маңғыстаулық балалар Нұр-Сұлтанға ота жасатуға барады. Әсіресе Ақтау қаласынан, Бейнеу және Маңғыстау ауданынан бар..

Ал маңғыстаулық дәрігерлер, ең күрделі оталарды облыстық балалар ауруханасының базасында жасауға болады және елордаға барудың қажеті жоқ екенін айтып отыр.

«Елордалық дәрігерді өңірге шақырып, тәжірибе алмасуға үшін келіссөз жүргізген Маңғыстау облыстық көпбейінді балалар ауруханасының директоры Аманбек Жұмыров. Енді келесі жылы Ағабек Чикинаев тағы да 2 шеберлік сабақ өткізуді жоспарлап отыр. Айта кетейік, елордалық дәрігердің Ақтауға жасаған сапарына «Exxon Mobil» компаниясының қаржылай қолдау көрсетті. Аталмыш мекеме бірнеше жылдан бері балалар ауруханасына жан-жақты қолдау көрсетіп келеді», - дейді Маңғыстау облыстық Денсаулық сақтау басқармасының баспасөз қызметі.

Ағабек Чикинаев бұған дейін Литва, Польша, АҚШ, Германия, Ресей, Франция, Англия және басқа елдерде тағылымдамадан өткен. Ол «Балалардағы кеуде деформациясын емдеу» тақырыбында кандидаттық қорғаған. Ол балалардағы кеуде қуысының, жамбас буынының және аяқтың даму ақауларын емдейтін білікті маман. Туа біткен және жүре пайда болған ортопедиялық патологиясы бар бірнеше балаға күрделі ота жасаған.

Жұлдызай ҚАЛИЕВА

Суреттерді ұсынған МО Денсаулық сақтау басқармасы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.