Күллі әлемде үрей туғызған CОVID-19 індеті бүкіл адамзат үшін денсаулықтан асқан құндылық жоғын, жақынына жанашыр, ынтымақта болудың баршаға ортақ жауапкершілік екендігін дәлелдеп берді. Жылдағы қалыптасқан дәстүр бойынша ЖИТС-ке қарсы күрес күндері басталып, оның ұраны «Жаһандық ынтымақтастық, ортақ жауапкершілік» аталды. Мұндағы мақсат — ел назарын қазіргі жағдайға аудару.
ЖИТС-тің алдын алу және оған қарсы күрес жөніндегі Маңғыстау облыстық орталығында 1994 жылдан күні бүгінге дейін АИТВ тинфекциясымен 405 адам тіркелген. Ал биылғы 10 айдағы мәліметке сүйенсек, 39 адам тіркелген. Олардың үшеуі шет елдер азаматтары болса, 36-сы Қазақстан азаматтары. Тіркелгендердің 28-і немесе 72%–ер және 11-і (28%) әйел адамдар. Вирус науқастардың 74%-на жыныс жолдары, 23%-на қан арқылы жұқса, 0,7%-на анадан балаға берілген.
«Жаһандық ынтымақтастық, ортақ жауапкершілік» акциясы өңірімізде қараша айының 16-22 аралығында өтеді.
- Біз жыл бойы қала тұрғындарымен етене жұмыс жүргіземіз, - дейді ЖИТС-тің алдын алу және оған қарсы күрес жөніндегі облыстық орталық директоры Алмабек Бисен. - Әрине, бұл күн мереке емес, дегенмен, бұл шараның тиімділігі бар. Әсіресе, тұрғындар назары CОVID-19 пандемиясына ауған шақта АИТВ-мен өмір сүретін адамдар назардан тыс қалмауы керек. Себебі, бұл адамдардың қауіпсіздігі, сақтық шарасы, тіпті жеке бастарына қатысты стигма мен кемсітушілікті жою, барлық мұқтаж жандарды қажетті дәрі-дәрмектермен және қызметтермен қамтамасыз ету, адам құқықтары мен гендерлік теңдікке негізделген тәсілдерді пайдалану – орталықтың басты міндетінің бірі. Осы міндеттерімізді орындау барысында біз қоғамдық белсенділік пен ынтымақтастықты сабақтастырып, АИТВ-ға шалдыққан адамдарды ақпаратпен, көрсетілетін қызметтермен, әлеуметтік қорғаумен қамтамасыз ете отырып оларға болашаққа деген үлкен үміт сыйлаймыз. Дүниежүзілік ЖИТС-ке қарсы күрес күнін жариялай отырып, біз бүкіл елді бізбен бірге дені сау қоғам құру жөніндегі күш-жігерімізді жандандыруға шақырамыз. Акция аясында жыл сайын Ақтау қаласында қоғам назарын аударуға арналған көптеген іс-шаралар ұйымдастырылып, халық көп жиналатын жерлерде ауқымды шаралар ұйымдастырып келдік. Биыл пандемия салдарынан туындаған карантин талабына орай өткізуді жоспарлап отырмыз. Яғни жоспардағы іс-шаралар онлайн түрде ұйымдастырылып, әлеуметтік желілер арқылы өтіп жатыр.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
