Саяси сабақтастық - даму негізі

Жуырда ғана Елорда төрінде Елбасы Н.Назарбаев Nur Otan партиясының аймақтық филиалдарының өкілдерімен кездесті. Келелі жиынға Nur Otan партиясының Парламент Мәжілісіндегі Фракция депутаттары, мәслихат фракцияларының хатшылары мен жетекшілері қатысты. Кездесу барысында партия төрағасының бірінші орынбасары Б.Байбек және партия филиалдарының өкілдері баяндама жасады. Ең алдымен баса назар аударар басты дүние - басқосу барысында Елбасы партия мүшелеріне Қазақстан президенті Қасым-Жомарт Тоқаевтың айналасында топтасып, саяси бағыттың сабақтастығын қамтамасыз ету қажеттігін  ескертті. Еліміздегі бастауыш партияның аймақтық филиалдары бас қосқан жиында Қазақстанның тәуелсіздік жылдары қол жеткізген жоғары жетістіктері мен толайым табыстары партия мүшелерінің қалтқысыз қызметімен тікелей әрі тығыз байланыста екендігі сөз болды.  Сондай-ақ Елбасы “Қазақстан - 2050” стратегиялық бағдарламасын жүйелі жүзеге асырудың түйінді тұстарын халыққа кеңінен түсіндіру маңызына тоқталды. ҚР Тұңғыш Президенті назарынан еліміздің әлеуметтік-экономикалық даму динамикасын айқындайтын көрсеткіштер тыс қалмады. Елбасы сан салалы экономика секторын  қарышты әрі үздіксіз дамыту жоспарына жекелей тоқталып, қоғам өміріндегі ең өзекті мәселелердің шешімін табуға бағытталған бағдарламалар барысы жайлы баяндады. Соның ішінде отандық кәсіпкерлік өрісін кеңейту, орта және шағын бизнесті ынталандыру, жұмыссыздықтың алдын алуға, халықты жұмыспен қамтуға арналған “Еңбек нәтижелі жұмыспен қамту және жаппай кәсіпкерлікті дамыту” бағдарламасын жемісті жүзеге асыру да келелі әңгіме арқауына айналды. Сондай-ақ басқосуда өңірлерді дамытудың  жаңа бағдарламаларын жасақтау және оларды мәслихаттардың сайлау жөніндегі сайлауалды бағдарламаларының негізіне айналдыру мәселесі сөз болды. Кездесу барысында Елбасы ашық партияішілік іріктеу өткізудің маңызына және бұл әдістің партия жұмысына жаңа серпін береріне баса назар аударды. Партия Төрағасы аймақтарда шоғырланған партиялық органдардың жұмысын күшейту бойынша бірқатар тапсырмалар жүктеді.

Жолдасова Светлана Түгелқызы Nur Otan партиясы Түпқараған аудандық филиалы төрағасының бірінші орынбасары