Маңғыстау ауданында Тұңғыш Президент күні тойланды

Маңғыстау ауданымызда Тұңғыш Президент күніне орай ұйымдастырылған шара аудан әкімдігінің мәжіліс залында өтті. Салтанатты жиынға ардагерлер, мәслихат депутаттары, ауыл әкімдері, мекеме қызметкерлері қатысты. Іс-шара Қазақстан Республикасының Мемлекеттік гимнімен басталды. Алқалы отырыста сөз алған аудан әкімінің орынбасары Е.Махмутов «Сіздерді Қазақстан Республикасының Тұңғыш Президенті күнімен шын жүректен құттықтаймын! Бұл елеулі күн - Тұңғыш Президент Нұрсұлтан Әбішұлы Назарбаевтың еліне, мемлекетіне сіңірген орасан зор еңбегіне деген барша Қазақстан халқының құрметінің белгісі. Қазақ елі тәуелсіздік алған күннен ел тізгінін халық сенімімен қолға алған Тұңғыш Президент Нұрсұлтан Әбішұлы Назарбаев елімізді бүгінде айбынды мемлекетке айналдырды. Бүгінде Қазақстанның экономикадағы, саясаттағы реформалары әлемдік ауқымда танылып отыр. Елбасының қай бастамасы болмасын өз өміршеңдігін дәлелдеуде. Қазақстан халқына жыл сайынғы Жолдаулары, стратегиялары, мақалалары еліміздің ең озық 30 елдің қатарына қосылу жолындағы мақсатты істері мен Қазақстанның бүгінгі келбетін айқындайды. Оқи отырыңыз: Денсаулық сақтау министрі маңғыстаулық дәрігердің жазбасына жауап берді Мерекеге орай аудан әкімінің алғысымен аудан әкімі аппаратының бас маманы Т.Көпбаева, М.Деменова, Жыңғылды ауылы әкімі аппаратының бас маманы А.Түйебаева, аудандық жұмыспен қамту және әлеуметтік бағдарламалар бөлімінің бас маманы А.Күзембаева, аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің бас маманы Л.Мақсотқызы, Шетпе ауылы әкімі аппаратының бас маманы А.Шарқатбаева марапатталды. Құттықтау сөз кезегінде «Нұр Отан» партиясы Маңғытау аудандық филиалы төрағасының бірінші орынбасары А.Ордабаева «Өздеріңіз білесіздер, жақында ғана Елордамыздың төрінде, Тәуелсіздік сарайында Елбасы, партия Төрағасы Нұрсұлтан Назарбаев «Nur Otan» партиясының өңірлік филиалдары өкілдерімен кездесті. Партия Төрағасының бірінші орынбасары Бауыржан Бәйбек және өңірлердегі партия филиалдарының жекелеген өкілдері баяндама жасаған шараға маңғыстаулық әріптестеріммен бірге мен де қатыстым. Сіздермен бірлесе жасаған қызметтің жемісін көріп, партия Төрағасының қолынан төсбелгі алдым. Осы орайда айтқым келгені — бұл тек менің ғана мерейімнің өскені емес, бұл баршамыздың бірлесе атқарған қызметіміздің жемісі. Елбасы қолымды алып тұрып, жайдарлы жүзбен «Маңғыстау еліне сәлем айтарсың» деген, партия Төрағасының аманатын орындап, баршаңызға Елбасы сәлемін жеткізгім келеді» деді. Мереке қарсаңында мемлекеттік қызметке жаңадан қабылданған Қызан ауылы әкімі аппаратының бас маманы Ғ.Балғабаев, Тұщықұдық ауылы әкімі аппаратының бас маманы Н.Мергенов салтанатты түрде ант қабылдады. Т.Жалғасбайұлы атындағы орта мектептің мұғалімі, жас ақын А.Серіков құттықтау сөзін жыр шумақтарымен жеткізді.

М.ЖЕБЕҚЫЗЫ