Ақтауда КВИ науқастары азайып, провизорлық стационар жұмысын тоқтатты. Бұл туралы облыс әкімі Серікбай Трұмов Үкімет отырысында мәлімдеді, - деп хабарлайды mangystaumedia.kz сайты.
«Облыста коронавирус инфекциясы бойынша ресми 2 743 адам тіркелді. Соңғы тәулікте 44 жағдай тіркелді, аурудың тәуліктік өсу қарқыны – 1,6%. Бұл карантиндік шектеулер арқасында жұғудың екі есе төмендегенін көрсетеді. 1 898 адам немесе 70,3% емделіп шықты», - деп атап өтті С. Трұмов.
Шілде айында пневмониямен ауырғандар саны 1 431-ге жетсе, қазір бұл көрсеткіш 56 пайызға төмендеп, 657 адам ем алып жатыр.
«Ақтау қаласындағы №1 жүз орындық провизорлық стационар жұмысы тоқтатылды. Себебі адам саны азайды. Бұл төсек-орындар кез келген уақытта пайдалану үшін резервте сақталады. Қазіргі уақытта 1 561 төсек-орын бар, оның толымдылығы – 53%», - дейді аймақ басшысы.
Жедел жәрдем шақыртулардың саны 45% пайызға төмендеді, оның ішінде пневмония бойынша шақыртулар шамамен 3 есеге азайды.
«Медициналық құрал жабдықтармен қамтамасыз ету бойынша облыста 218 өкпені жасанды тыныстандыру аппараты бар, оның 121-і короновирус инфекциясымен ауыратын науқастарды емдеуге тартылды. Коронавирустық инфекциямен күресте 336 дана оттегі концентраторы бар. Өңірдегі денсаулық сақтау ұйымдарында кислородтық станцияларды құруға 7 нысан жоспарланды. Қазір облыстық резервтен 24 млн теңге бөлініп, бұл жұмыстар басталып кетті», - дейді өңір әкімі.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
