Бүгін, 20 тамыз күні «Мектепке жол» қайырымдылық акциясы өткізілді. «Біз мектепке барамыз» ұранымен Маңғыстау облысы бойынша 100-ден аса оқушыға мектеп формасы мен күнделік табысталды, - деп хабарлайды mangystaumedia.kz сайты.
Акцияның негізгі мақсаты – жаңа оқу жылына дайындық кезеңінде аз қамтылған және көп балалы отбасыларға, жетім және ата-анасының қамқорлығынсыз қалған балаларға көмек көрсету. Осы орайда Қазақстан Коммунистік Халық партиясының облыстағы өкілдері әр аудан мектептеріне барып, балаларды қажетті заттармен қамтамасыз етті. Қайырымдылық шарасының алғашқы күні Мұнайлы ауданы Батыр ауылындағы №10 орта мектептен басталды. 2014 жылы ашылған үш ауысымдық мектепте 4000-нан аса оқушы білім алады екен. Соның ішінде аз қамтылған және көпбалалы отбасыдан шыққан балалар да бар. Аталған шара аясында бүгін 20 бала мектеп формасын алды. «Мектепке жол» акциясы аясында қамқорлық танытып, көмек беріп жатқан жандарға және мектеп ұжымына алғысымды айтамын. Мектеп формасының өзі біз үшін үлкен көмек. Жаңа күнделіктің ішін тек 5 пен 4-ке толтырамыз деген үміттемін», - дейді Тойгүл Төлегенова. Тойгүл Төлегенова – 5 баланың анасы. Отбасына жыл сайын мектеп ұжымы және кәсіпкерлер тарапынан көмек көрсетіледі. Биыл да игі үрдіс (жалғасын тапты. Ізгі шара Атамекен ауыл округіндегі №7 мектепте жалғасын тауып, концерттік бағдарламаға ұласты. Ата-аналар да қайырымдылық жасауға келген қонақтарға өз ризашылығын білдіріп, алғыстарын айтты. Мұнайлы ауданының тұрғыны Жадыра Мұсаева бүгінде 6 баланы тәрбиелеп, оның білім алуына мүмкіндік жасап отыр. Үйдің үлкені 6-сынып оқыса, қызым Аяулым 4-сыныпқа қадам басқалы тұр. «Көпбалалы отбасы ретінде бізге көмектесіп, қамқорлық танытып жатқаны қуантады. Қазір бір баланы мектепке дайындау үшін біраз қаражаттың кететіні белгілі. Осы ретте мектеп формасын, яғни белдемше, жакеті мен костюмын сыйға тартуының өзі үлкен көмек болды. Сонымен қатар балалар жақсы оқысын деген ниетпен күнделік те берілді.Қайырымды жандарға алғысым шексіз», - дейді ол. Балаға қуаныш сыйлаған шара алдағы уақытта да өз жалғасын таппақ. ҚКХП-ның бірінші хатшысы Роза Махамбетованың айтуынша, ай соңына дейін облыс аудандарын аралап, көпбалалы және аз қамтылған отбасыларға қол ұшын береді. Сондай-ақ оқу жылының соңында үздік оқыған балаларға жазғы демалыс орнына жолдама және бағалы сыйлықтарды беруді жоспарлап отыр.Жұлдызай ҚАЛИЕВА
Суреттер автордан
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
