Мәжіліс депутаттары Маңғыстаудағы өндіріс орындарын аралады

ҚР Мәжіліс депутаттары Маңғыстау өңіріне жұмыс сапарымен келіп, бірқатар нысандарды аралады. Халық қалаулылары, ең алдымен, «МАЭК-Қазатомөнеркәсіп» өндіріс орнында болып, кәсіпорын ұжымымен кездесті. Комбинат Ақтау қаласы мен жақын маңдағы кент­тердің тұрғындарын, сондай­-ақ өңірдің өнеркәсіп­тік кәсіпорындарын ауыз сумен және шаруашы­лық сумен, жылумен және электр энергиясымен сенімді жабдықтайды. Комбинатта бүгінде 4 мыңға жуық жұмысшы мен мамандар қызмет істейді. Қазіргі уақытта кәсіпорынның 600 Мвт­-тан аса электр қуатымен жұмыс істеу және тәулігіне 60 мың текше метрден астам дистиллят шығару мүмкіндігі бар. Халық қалаулылары кәсіпорын ұжымымен кездесу барысында еліміздегі негізгі басым бағыттарға, оның ішінде әлеуметтік қамсыздандыру саласына баса назар аударып, ха­лықтың әл-­ауқатын жақсартуға ерекше мән беріп келе жат­қандығын жеткізді. Мәжіліс депутаты Сәкен Өтебаев жиында облыстың эко­номикалық-­әлеуметтік ахуалына қатысты өзекті мәселелерді қозғады. Әсіресе қоғамда көп қозғалған тақырыптың бі­рі – атаулы әлеуметтік көмек мәселесі қаралды. «Көп балалы отбасыларға, аналарға көмек көрсетудің ішіне жәрдемақы, баспана, балабақша, мектеп мәселелері кіреді. Бірінші кезектегі маңызды мәселе – баспана. Мұнан кейін, көп балалы от­басылардың әлеуметтік жағдайын көтеру. Бұл ретте көп балалы отба­сыларды баспанамен қамтамасыз ету үшін ке­зегі ерекше жағдайда қа­растырылмақ» – дейді С.Өтебаев. Сәкен Өтебаев Жаңа­өзен қаласында халықпен кездесу кезінде жергілікті тұрғындардың жұмыс­пен қамтылу мәселесі де баса назарға алынғанын атап өтті. «Жаңаөзендегі жұмыспен қамтамасыз ету мәселесі жіті қа­растырылып жатыр. Мен Маңғыстауға әр келіп кеткен са­йын үкіметтің алдында осы мәселені көтеріп жүрмін. Көп­шілік адам мұнай саласында жұмыс істегісі келеді. Бірақ бұл салаға да жаппай жұмысқа қабылдай бермейді ғой. Мұнай кәсіпорындарының да өзіндік талап-­шарттары, мәселелері бар. Біздің ойымыз – қоғамда басқа да салаларды дамытып, жұмыс көздерін ашу. Мен де, әріптестерім де бұл мәселені Үкіметте міндетті түрде көтереміз, талқылаймыз. Халық­ пен кездесуде көтерілген мәселелерді біз сауалнама, хат тү­рінде дайындап, үкіметке жеткіземіз», – деп сөзін түйіндеді С.Өтебаев. Мәжіліс депутаты, Заңнама және сот­-құқықтық реформа комитетінің мүшесі Анар Жаилғанова жиында еліміздегі сот­-құқық саласындағы өзекті мәселелерді тілге тиек етті. «Еліміздің тұңғыш Президенті – Елбасы бізге нақты мә­селелер қойып, соттарға халықтың сенімі артуы тиіс деген талап қойған болатын. Еліміздегі кез келген сот ісі қатаң заң аясында, белгіленген тәртіп-­ережеге сай жүргізілуі қажет. Біз осы мәселелерді реттеуде, ең алдымен, кадр мәселелерін қарадық, сот жүйесін кімдер терең білуі тиіс, сот лауазымына үміткерге қойылар талаптар қандай, бірқатар мәселелерді заң жобасында қарастырдық. Сотқа деген халықтың сенімі біздің азаматтарымыздың сот шешіміне қанағаттануына байланысты. Сот шешімдері құқықтық әрі заңдық тұрғыдан әділ шығарылуы тиіс. Біз бұл бағытта көп күш жұмсап, жұмыс жүргіздік, сәйкесінше заң қабылданды. Қа­зір заман өзгерді, білім жаңғырды. Бүгінгі жастар шетелде білім алып, халықаралық тәжірибе жинауға мүмкіндік алды. Сот саласындағы жұмыстар да осындай жаңғыруды қажет ететіні – заңдылық. Құқық­тық қатынастар да бүгінгі қоғамда жаңа пікір-таластарды тудырады. Сот өкілдері осыған дайын болуы тиіс. Біз елімізде дұрыс құқықтық қоғамдық қатынастар орнап, ха­лықтың сотқа деген сенімі артуы үшін бұл жұмыстарды ұдайы жүргізе  береміз»,  –  дейді Мәжіліс депутаты Анар Жаилғанова. Кездесу соңында кәсіпорын ұжымы халық қалаулыларына өз ұсыныс­-пікірлерін айтып, пікір алмасты. Бірқатар өзекті әлеуметтік мәселелер көтеріліп, айтылған барлық ұсыныс­-пікірлер Мәжіліс депутаттарының назарына алынды.

Жайық НАҒЫМАШ

[gallery td_select_gallery_slide="slide" ids="78669,78670,78672,78673"]