Жаңаөзенде «Қыз жолы» конгресі өтті

«Қыз жолы» жобасы аясында «Бекен» жас көшбасшылар достастығы және Жаңаөзен қалалық жастар ресурстық орталығының бірлесе ұйымдастыруымен «Қыз жолы» қыздар конгресі өтті. Мақсаты - қыздар арасында әлеуметтік мәселелерді талқылау, жасөспірімдер арасында неке және отбасы құндылықтарын насихаттау, сонымен қатар, мектеп бітіруші қыздарға кәсіптік бағыт-бағдар беру. Қыз баланы тәрбиелеу деген сөз - ұлтты тәрбиелеу деген сөз. Бесігінде жақсы тәрбие алған, үлгі-өнеге көрген қыз бала ержеткенде сол әдетін сақтайды. Бүгін қыздар өнегелі тәрбие алса, ертең ұрпақ тәрбиелейтін қазақтың дана аналарына айнала­ры сөзсіз. Қазақ халқының мақсаты - әдет-ғұрып, салт-дәстүрлерін қыз баланың бойына сіңіре отырып, қыз балаға келешекте ана, ақ босағаның аруы, шаңырақтың құт-берекесі екенін ұғындыру, сыпайылыққа, инабаттылыққа тәрбиелеу. Қыздың бойжетуі, яғни жан-жақты жетіліп, белгілі дәрежеде өмір тәжірибесіне ие болуы заңды құбылыс. Қыздар конгресінің отырысы - білім және медицина мамандарының кеңесін қамтитын «Маман кеңесі», қыздармен сыр шертер, құпия бөлісуді көздейтін «Өмірлік бағдар» және білгенімен бөлісуді мақсат тұтатын «Білгенге маржан» бөлімдерінен тұрды. Аталған жиынның «Маман кеңесі» бөлімінде № 2 Жаңаөзен қалалық емханасының психолог маманы Айсұлу Нұрдәулетова әлеуметтік мәселелерге тап болған жағдайда қыздардың алғашқы қадамдары жайында өмірлік кеңесімен бөліссе, аталған емхананың акушер-гинеколог дәрігері Динара Тұрышова ерте жүктіліктің алдын алу бойынша кеңінен ақпарат берді. «Өмірлік бағдар» бөлімінде Жаңаөзен қалалық аналар кеңесінің төрайымы Гүлбарам Құдышқызы қыз бала мен ананың арасындағы байланыстың маңыздылығын сөз етсе, Жаңаөзен қалалық мәслихат депутаты Айсұлу Исаева қыз тәрбиесінде қоғамның өзіндік жауапкершілігі болуы керектігін атап өтті. «Білгенге маржан» бөлімінде «Несібе» ет-сүт өнімдері дүкенінің негізін қалаушы, «Несібе» той ұйымдастыру орталығының басшысы Ма­дина Лепесбаева бүгінде келіндік міндетімен бірге кәсіпкер атануындағы ойымен бөліссе, «Тоффи торт» кондитерлік дүкенінің басшысы, көп балалы ана Динара Қосжан отбасы мен кәсіпті ұштастыру жайында кеңесімен бөлісті. 300-ге жуық Жаңаөзен қаласының студент қыздары бас қосқан шара соңында қатысушылар келген қонақтарға көкейіндегі сұрақтарын қойып, жауап алды.

Гүлмира ТЕҢЕЛБАЕВА, Жаңаөзен ЖРО маманы