Құрылысшылар қашан да құрметке лайық

Құрыш қолды құрылысшылардың кәсіби мерекесі қарсаңында олардың еңбегін елеп, сый-сияпат көрсету дәстүрі биылғы жылыда өз дәрежесінде өтті.

Алдымен Маңғыстаудың әлеуметтік, экономикалық дамуына үлес қосып отырған «Каспий Цемент» ЖШС ұжымының ұйымдастыруымен ұлттық спорт түрлерінен өткен жарыстың куәсі болдық. Меке­ме қызметкерлері арқан тарту, қол күресі, кір тасын көтеру сынды ойындарға белсене қатысты. Тартысты бәсекенің жеңімпаздары ар­найы диплом, кубоктармен марапатталды. Сондай-ақ қызметкерлер арасында ұтыс билеті ойнатылып, бәйгеге тігілген төрт түліктің момы­нын теміржол цехынан А.Нұрғалиев еншіледі.

Ашық аспан астында сән-салтанатымен өткен шара мұнымен тоқтап қалған жоқ. Мерекеге орай мекеме жанынан тігілген темір қанатты үйде Маңғыстау ауданының дамуына еңбегі сіңген ақсақалдарға арналып дастархан жайылды. Еңбектерін елеусіз қалдырмаған жас буынға риза болған ақсақалдар қажырлы еңбектеріне табыс тілеп, ақ бата­сын берді. Мейрам иелеріне мерекелік көңіл – күй сыйлай келген ау­дан өнерпаздары әннен шашу шашты.

Орталық алаңда мерекеге орай ұйымдастырылған концерттік бағдарламаны тамашалауға жиналған халықтың санында шек болма­ды. Әсіресе жазғы демалыстарын ауылда өткізіп, жаңа оқу жылына даярланып жүрген студент жастардың басым көпшілігі осында жинал­ды. Кеште өнер көрсеткен әнші, биші, сондай-ақ балаларға арналған театрландырылған қойылым жиналған дүйім халықтың көңілінен шыға білді.

Салтанатты кеште сөз алған Маңғыстау ауданы әкімінің орынбасары Е.Махмутов: «Құрылысшылар жер бетіндегі бейбіт, жасампаз мамандықтың иесі деп білемін. Елбасымыз «Құрылыс - ел экономикасының локомотиві» деп атап көрсеткен еді. Бұл - құрылысшыларымыздың еңбегіне берілген зор баға. Сіздер аудан экономикасына да сүбелі үлес қосып келесіздер. Тұрғын үй бағдарламаларын іске асырудағы құрылысшылардың қолтаңбасын ерекше айтуға болады. Тәуелсіздіктің 25 жылдығы, Шетпе селосының 50 жылдығына орай «каспийцементтіктердің» тар­туы-теміржол бойындағы аспалы көпірдің өзі неге тұрады? Құрметті құрылысшылар, сіздердің халық игілігіне жасап жатырған еңбектеріңіз өлшеусіз. Барша құрылыс саласының қызметкерлерін айтулы мереке­мен құтықтаймын», - деп ақ тілегін арнады.

Сондай-ақ цемент зауытының директоры Ю.Усольцев абыройлы еңбек етіп, белсенділік танытып жүрген бірқатар сала мамандарын Алғыс хат және ақшалай сыйлықтармен марапаттады. Олардың қатарында Қ.Исатаев, М.Оңайбаев, Д.Тәжіғұлов, С.Жантақбаев, Е.Алтыбаев, Б.Жұбауов, Ж.Исаев, Ә.Ізбасаров, А.Тавкенов, А.Аюпов, М.Еңсегенов, Б.Қармысов, Н.Айлеков, С.Мағзамов, О.Садуақасов, Р.Яхудаев, Д.Вейкман, Ж.Күзенбаев, Ж.Шамғұл болды.

Айнагүл АХТАШОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.