Қарақияда мемлекеттік қызметші күні аталып өтті

Қазақстан Республикасы Президентінің 2013 жылғы 20 желтоқсандағы Жарлығына сәйкес 23 маусым – Мемлекеттік қызметшілер күні ретінде аталып келеді. Мемлекеттік қызмет үлкен жауапкершілікті жүктейді. Сондықтан адам құндылығы  ізет ету қашанда мерейлі іс болып табылады.

Осыған орай жақында аудан әкімдігінің үлкен мәжіліс залында мемлекеттік қызметкерлердің кәсіби мерекесі салтанатты түрде аталып өтті. Салтанатты шараға мекеме, бөлім басшылары және мемлекеттік қызметкерлер қатысты. Еліміздің мемлекеттік әнұранымен басталған жиында алғашқы сөз кезегін алған аудан әкімінің міндетін атқарушы Қ. Әндірұлы:

- Мемлекеттік қызметкерлердің ең басты міндеті – еліне адал еңбек ету. Осы қағиданы берік ұстанған әрбір мемлекеттік қызметші ел абыройын асқақтатады. Сондықтан  «Басты міндет – елге  қызмет» деген жауапты сөзді ескере отырып, мемлекеттік қызметші деген абыройлы атаққа үнемі лайықты қызмет атқаруға шақырамын! – деп, мемлекеттік қызметкерлерге тілектестігін білдірді.

Жиында Маңғыстау облысы әкімі Е. Тоғжановтың алғыс хатымен білім бөлімінің басшысы К. Байбосинова,  аудандық тұрғын үй коммуналдық шаруашылығы, жолаушы көлігі және автомобиль жолдары бөлімінің бас маман есепшісі А. Құлиманова, аудан әкімінің кеңесші заңгері  Л. Жолдасбаева марапатталды. Сонымен қатар аудан әкімінің  міндетін атқарушы  Қ. Беков өз міндетін жауапты атқарғаны үшін ауданның үздік қызметкерлері, аудандық ішкі істер бөлімінің жергілікті полиция қызметкерінің учаскелік полиция инспекторының көмекшісі Т.Қарабалаев, аудандық ауыл шаруашылығы және ветеринария бөлімінің бас маман есепшісі А. Жанайбаева, аудан әкімі аппаратының төтенше жағдайлар жөніндегі бас маманы С. Құсайынов, аудандық білім бөлімінің бас маман есепшісі С. Нұргалиев, аудандық кірістер басқармасының бас маманы Н. Джаманбаева, аудандық мәслихаттың бас маманы А.Сулейменоваларды марапаттады.  Марапат рәсімінен соң аудандық білім бөлімінің басшысы К. Хисарқызы:

- Осы білім саласында еңбек етіп жүргеніме бірнеше жылдың шамасы болды. Мемлекеттік қызметшілер өздерінің төл мерекесінде марапатталып, түрлі тілектерге бөленгендеріне қуаныштымын. Мемлекеттік қызметкер болу - зор құрмет. Себебі, қоғам мен мемлекет арасындағы байланысты нығайтатын мемлекеттік қызметкерлер! - деп өзінің ықыласын жасырмады. Салтанатты шара аудан өнерпаздарының мерекелік концертімен жалғасты.

Фариза ХАЙДАРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.