Былтыр арнайы қор маңғыстаулық 5 имамға қаржылай көмек көрсеткен

©

Қазақстан мұсылмандары діни басқармасының Маңғыстау облысындағы филиалы ретінде 33 мешіт тіркелген. Олардың екеуі Ақтау қаласында, 5-уі Жаңаөзен қаласында, 6-уы Бейнеу ауданында, 5-уі Мұнайлы ауданында, 7-уі Маңғыстау ауданында орналасқан. Түпқараған ауданы мен Қарақияда 4 мешіттен бар.

Бұл туралы бүгін өңірлік коммуникациялар қызметінде өткен баспасөз жиынында ҚМДБ-ның Маңғыстау облысы бойынша өкіл имамы Смайыл Сейтбеков айтты.

"Жақында ғана ашылған Мұнайлы ауданы Басқұдық ауылындағы «Төлей ишан» мешітінің құжаттары рәсімделуде. Облыс көлемінде салынып жатқан мешіт жоқ. Алайда Батыр, Құланды, Онды, Жармыш пен Қызан ауылдарында, Мұнайлы ауданының Маңғыстау-5, Қызылтөбе-2, Дәулет ауылдарында тұрғындар мешіт салуды жоспарлап отыр", - деді С.Сейітбеков.

Осы 33 мешітте бас имам, найб имам, азаншы, молда және ұстаздар сияқты жалпы саны 97 маман қызмет етеді. Оның 42-сі жоғары діни білімді, 23-і медресе бітірген болса, 3 имам екі жылдық Ислам институтын бітірген. Қалған 29 маман түрлі курстарды тәмамдаған.

"Арнайы діни білімді маман жетіспеушілігіне байланысты Бейнеу ауданына қарасты Төлеп және Сарға ауылдық мешіттеріне енді дін қызметкерлерін тағайындап жатырмыз. Облыста діни білімді әрі білікті маманға сұраныс бар", - С. Сейітбеков.

Ал имамдардың әлеуметтік проблемалары қалай шешіліп жатыр десек, Маңғыстаудың бас имамы Дін істері және азаматтық қоғам министрлігі жаныннан «УАҚЫП» қайырымдылық қорының құрылғанын айтты. Бұл қор былтыр 5 имамға 4 ай бойы қайырымдылық ретінде 50 000 теңге қаржылай көмек берген. 2018 жылдың қаңтарынан бастап әлеуметтік көмек алатын имамдар саны артып, 9 имамға 55 000 теңге қайырымдылық ретінде беріліп келеді.

Өйткені имамдар тұрақты жалақы алмайды. Сондай-ақ оларға арналған қызметтік баспананың болмауы да аудандық, ауылдық жерлерге білімді маман тарту қиын екен.

"Дегенмен мешіт ауласына қызметтік пәтер салуды жүйеге қойдық. Қазіргі таңда 33 мешіттің 14-інде мешіттің ауласында қызметтік баспана бар. Ал екі мешіт ауласында құрылыс жүріп жатыр. Оған қоса, әкімдік тарапынан 4 имамға қызметтік баспана берілді", - деді сұхбат берушілер.

Дегенмен Маңғыстауда 2015 жылы - 7, 2016 жылы - 11, 2017 жылы 16 маман түрлі себептерге байланысты  жұмыстан кеткен.

Маңғыстаудың бас имамы жергілікті мамандарды даярламай дін мәселесіне қатысты проблемаларды шешу оңайға түспейтінін алға тартады. Өзге өлкелерден теолог не діни жоғары білімді мамандарды шақырып, барлық ауыл-аймақты қамту қиын.

"Сондықтан 4 жылдан бері облыстан діни оқу орындарына екі жүзден аса талапкер жіберілді. Биыл Маңғыстауға Нұр-Мүбарак Египет ислам мәдениеті университетін исламтану мамандығы бойынша 16 жас маман бітіріп келеді, Олардың 9-ы - Маңғыстаудың тумалары", - дейді С.Сейітбеков.

Камшат ОҢҒАЛТАЙ,

басты сурет сайттың архивінен

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.