Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Жақында «Абыл» мәдениет үйінде өлеңде өзіндік қолтаңбасы бар ақын, бірнеше кітаптардың авторы, белгілі журналист, қарымы мықты қаламгер, жазушы, қазақ әйелінің бар болмысын бойына жинай білген адал жар, өнерлі отбасының абыз анасы – Айнахан Есетованың «Құсни ғұмыр» атты сазды поэзиялық кеші өтті. Бұл шығармашылық кеш өткен ғасыр бедерінде қалтарыста қалып келе жатқан ел тағдыры жайлы сыр шертетін, айдауда кеткен арыстарын күткен маңғыстаулық аруларға һәм бүгінгі ұрпақтың ұлы аналарына арналған "Байсұлу" поэмасының театрландырылған қойылымымен бастау алды. Елімізде алғаш рет ұйымдастырылған Республикалық "Мен қазақпын" мега жобасының жыр-терме жанры бойынша "Бас жүлде" иегері - Оспан Құлсымақ ақынның сөзіне жазылған "Мен едім" атты термесімен кешті одан әрі жалғастырды.
Сондай-ақ ақынның өлеңдерін бір топ дарынды өнерпаздар жатқа оқып, Айнахан Есеттің сөзіне жазылған бірнеше жаңа әндерін күміс көмей, жезтаңдай әншілер әуелете шырқап, көрермендерге ерекше көтеріңкі көңіл-күй сыйлап, кештің көркін келтірді. Одан кейін өнер өлкесінде ақынның соңынан ерген шәкірттері, жас ақындар арнау өлеңдерін оқыды.
ТАҒЫ ОҚЫҢЫЗ: Ақтауда 8 622 500 қорапша контрабандалық темекі тәркіленді (ФОТО, ВИДЕО)
Мерекелік кеште аудан әкімі Әбілов Бейнеубек Көңілімқосұлы Айнахан Есетованың поэзия жанрындағы – «Бойтұмар», проза жанрындағы - «Үстірт балладалары» атауындағы жаңа қос кітабының тұсауын кесті.
Жыр кешке арнайы келген қонақтар арасынан ақын, мемлекеттің сыйлықтың иегері - Сабыр Адай, "Маңғыстау медиа" ЖШС директоры - Сағындық Рзахметов және Маңғыстау облыстық ғылыми-әдістемелік және мәдени қызмет көрсету орталығы директорының орынбасары - Сапарова Злиха Теңелбайқызы ортаға шығып, құттықтау лебіздерін білдіріп, сөз сөйлеп, сый-сияпаттарын ұсынды.
Кеш соңында ақын өнерін құрметтей келген халқына, осындай әдемі жыр кешін ұйымдастырып, өткізілуіне ықпал білдірген аудан әкімдігі мен мәдениет қызметкерлеріне өз ыстық-ықыласын білдіріп, алғысын айтты.
Үміт ҚАЗДАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.