Алтын той қарсаңында

©

Биыл Жаңаөзенге - 50 жыл. Мұнайлы қаланың жарты ғасырлық торқалы тойын мерекелеудің бағдарламасы өткен жылдың қараша айынан бастап бекітілген болатын. Дүбірлі тойдың шымылдығы Амал мерекесімен қатар ашылды. Содан бері қалада жоспарға сәйкес әртүрлі іс-шаралар өткізіліп келеді. Сәуір айында қалада бүйрек жеткіліксіздігімен ауыратын науқастарға сапалы қызмет көрсету мақсатында Гемодиализ орталығы ашылды. Жоба Мемлекеттік жекешелік әріптестік есебінен Астана қаласы «Эндохирургия клиникасы» ЖШС-мен бірлесе жүзеге асырылды.

Мерейтой қарсаңында қаланы абаттандыру мен тазалық жұмыстары тұрақты түрде жүргізіліп, өлкені жаппай көгалдандыру аясында қала бойынша 3000 түп ағаш көшеттері отырғызылды.

Бұл орайда мәдени және спорттық шаралар да ұдайы өткізілуде. Сәуір айында мемлекет басшысы Н.Назарбаевтың «Болашаққа бағдар: рухани жаңғыру» бағдарламалық мақаласына сәйкес, Жаңаөзен қаласының 50 жылдығы аясында аймақтық ақындар айтысы өтті. Сондай-ақ, Астана қаласы Жастар театры мен Маңғыстау облыстық Н.Жантөрин атындағы драма-театрлары да арнайы шақырылды.

Бұдан өзге, қала көлемінде «Жеңісім саған, Жаңаөзен!» атты велошеру, грек-рим күресінен жасөспірімдер арасында І Республикалық ашық турнир, үстел теннисі, дойбы, бильярдтан спорттық шаралар ұйымдастырылды. Жастардың белсенділігін арттырып, патриоттық сезімін ұштауда мерейтой қарсаңында қалалық Жастар ресурстық орталығы ұсынған «Туған күніңмен, Жаңаөзен» атты жайдарман ойыны да көрермендеріне керемет кеш сыйлады.

Алда Жаңаөзен қаласындағы тозығы жеткен көп қабатты тұрғын үйлердің конструкцияларын бекіту шараларын аяқтау, Рахат ауылында, «Рауан», «Арай» шағынаудандарында әрқайсысы 900 орындық орта мектептерді іске қосу, өндірістік алаңына (технопарк) инженерлік инфрақұрылымын жүргізу жұмыстарын аяқтау, «Химиялық өнім шығаратын автоцех» кешені мен «Құрғақ құрылыс қоспаларын дайындау» шағын зауытын, «Резеңке ұнтағынан өндірілген едендік төсемелер» өндіріс зауытын іске қосу, Рахат ауылында спорт кешенін пайдалануға беру, тәулігіне 30 000 м3 Еділ суын тазарту ғимаратын іске қосу, автокөліктерге газ толтыру компрессор бекетін іске қосу, «Жуғыш құралдарды өндіру және қатты тұрмыстық қалдықтарды қайта өңдеу» цехын ашу сияқты ірі жобалар өз кезегін күтуде.

Айжан НАСЫРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.