Жаңартылған білім беру бағдарламасының ерекшеліктері айтылды

Ақтау қаласындағы Назарбаев Зияткерлік мектебінде Маңғыстау облысы мұғалімдерінің аймақтық тамыз конференциясы өтті. Биылғы жылғы тамыз кеңесінің тақырыбы «Жаңартылған білім беру бағдарламасының ерекшеліктеріне» арналды. Облыстағы 700-ге жуық педагогқа зияткерлік мектеп ұстаздары жаңа оқу жылына енетін білім беру бағдарламасының ерекшеліктеріне сәйкес шеберлік сағаттарын көрсетті. Одан бөлек,  сабаққа дайындалуға, біліктілікті арттыруға мүмкіндік беретін жүйелік-методикалық комплекстермен, сыни бағалау жүйесімен таныстырды. Баршаға белгілі, 2017-2018 оқу жылынан бастап барлық жалпы білім беру мектептеріндегі 2,5,7 сынып мұғалімдері жаңартылған мазмұндағы білім беру бағдарламасы бойынша оқытуды бастайды. Осыған орай конференция барысында жаңа бағдарламаның ерекшеліктері де айтылды. Жаңартылған білім беру бағдарламасы мұғалімнің сабақты оқушылар оқу мәселелерін барынша өз бетімен шешетіндей етіп ұйымдастыру мақсатында құрастырылған. Пәндер бойынша оқыту нәтижелері  «біледі», «түсінеді», «қолданады» сияқты ойлау дағдыларымен қатар жоғары деңгейдегі «талдау», «синтездеу», «бағалау» дағдылары бойынша жіктелген және жүйелендірілген. Жаратылыстану-математикалық пәндер бойынша кіріктірілген жобалық жұмыстарды орындау оқушылардың STEAM-білім беру, инженерлік, сыни және шығармашылық ойлау қабілетінің дамуына ықпал ететін болады. Тілдерді оқыту сөйлеу әрекеттерінің төрт түрі: тыңдалым, айтылым, оқылым және жазылым дағдыларын дамыту арқылы оқушылардың тілдік құзыреттілігін қалыптастыратын коммуникативтік тәсілдемеге негізделген. Сонымен қатар, сыни бағалау жүйесіне оқыту мен бағалаудың арасындағы өзара байланыс жүйеге қойылды. Оқушының білімін бағалау қорытынды және жиынтық бағалау арқылы жүзеге асырылады.Тамыз конференциясындағы көтерілген тағы бір басты мәселе- ұстаздардың кәсіби шеберлігін арттыруға мүмкіндік беретін онлайн-ресурстар. Конференция барысында мектеп директоры Ермек Пайзов жаңартылған білім беру жүйесіне қатысты кеңес беріп, сұрақтарға жауап беру мақсатында жұмыс істейтін-жүйелік-методикалық кешенді сайты және сандық білім беру ресурсы  туралы баяндады. Мұнда пән мұғалімдері үшін онлайн-сабақтар, әдістемелік құралдар, сабақ жоспарлары жинақталған. Педагогтар өз сауалдарына аталмыш сайттан жауап тауып, тіпті өз тәжірибесін бөлісе алады. Сонымен қатар, сандық білім беру ресурсы іске қосылды. Бұл балалардың пәнге деген қызығушылығын арттырып, оқу материалын жеңіл меңгеруге көмектеседі деп күтілуде. Жалпы, Маңғыстау облысында жаңартылған білім беру бағдарламасы бойынша үш жыл ішінде 3500-ге жуық мұғалім даярлық курстарынан өткен. -Ақтау қаласындағы Назарбаев Зияткерлік мектебінің тәжірибесін трансляциялау үшін бекітілген пилотты мектептермен биыл да тығыз жұмыс жасалды. Баутино ауылындағы М.Горький атындағы мектеп-лицейі мен Ақтау қаласындағы  №11 мамандандырылған физика-математика бағытындағы мектебіне зияткерлік мектептің педагогикалық ұжымы 32 семинар өткізіп, 360 мұғалім дайындалды. Сонымен қатар, тіл үйренуге бағытталған қысқа мерзімді 4 курс ұйымдастырылды. Осылайша, пилоттық мектептердің ұстаздары да зияткерлік мектеп ұстаздарымен тәжірибе алмасты,-дейді зияткерлік мектеп директоры Ермек Пайзов.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.