NCOC облыста бірқатар әлеуметтік-инфрақұрылымдық жобаларды іске асырып жатыр

Маңғыстау облысының әкімі Нұрлан Ноғаев «NCOC» компаниясының өкілдерін қабылдады, деп хабарлайды mangystaumedia.kz

Маңғыстау облысында инвестициялық жобаларды жүзеге асыру үшін барлық жағдай қарастырылған. «NCOC» компаниясының басқарушы директоры Оливье Лазар аймақ басшысына осы бағыттағы жұмыстарын жалғастыратынын жеткізді.

Айта кетсек, NCOC компаниясы облыста бірқатар әлеуметтік-инфрақұрылымдық жобаларды іске асырды. Атап айтқанда, 180 орындық модульді жұқпалы ауруханасы, оқушылар сарайының құрылысы, Ақтау қаласының шағынаудандарын абаттандыру және 500 орындық студенттер жатақханасын салды.

Қазіргі уақытта «NCOC» компаниясы Маңғыстау ауданындағы Тасмұрын және Тиген елді мекендеріне газ тарату жүйесін жүргізуді, Форт-Шевченко қаласында 100 орындық жатақхана мен 260 орындық өнер мектебін салуды, тап осындай өнер мектебін Қарақия ауданының Құрық ауылында салуды жоспарлап отыр. Сонымен қатар, Форт-Шевченко қаласында тәулігіне бес мың текше метр теңіз суын тұщытатын станция құрылысын жүргізуді көздейді.

Облыс әкімі компания өкілдеріне табысты әріптестік үшін алғыс айтып, азаматтық қоғаммен байланысты арттыруға және осы бағыттағы жұмыстарды жандандыруға шықырды. Өңір басшысының айтуынша, үкіметтік емес ұйымдарды компания тарапынан қолдау аймақтың әлеуметтік-экономикалық жағдайына оң әсерін тигізеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.