Ұлы Отан соғысының аяқталып, Жеңіс таңының атқанына биыл - 73 жыл. Сұрапыл со5ыс жылдары Маңғыстау өңірінің әрбір төртінші тұрғыны, яғни 6 мыңнан астам жауынгер соғысқа аттанып, олардың 4800-ге жуығы елге оралмады. Ресми деректерге сүйенсек, Ұлы Отан соғысы басталғанда Гурьев облысының Маңғыстау ауданында 46480 адам тұрған. Әскери бөлімдердің, әскери комииссариаттың күшімен жер-жерде әскери жасақтар құрылды. Сол кезде Маңғыстаудан 1 батальон, 5 рота, 16 взвод, арнаулы тапсырмалар орындайтын 4 взвод, байланысшыларды, граната лақтырушыларды, атқыштарды дайындайтын взвод құрылған.
Бүгін Ақтау қаласындағы «Мәңгілік алау» жанында Жеңіс күніне орай меркелік шеру өтті. Оған қала халқы мен қонақтары, ардагерлер, өңір басшылары мен әскери қызметкерлер қатысты.
Алдымен сарбаздар бастап, ардагерлер мен басшылар бастаған топ гүл шоқтарын алып жүріп, «Мәңгілік алауға» гүл шоқтарын қойды. Бұдан соң қан соғыста қаза тапқан ардагерлерді бір минут үнсіздікпен еске алып, аспанға үш дүркін оқ атылды.
Бұдан соң Маңғыстау облысының әкімі Ералы Тоғжанов ардагерлер мен маңғыстаулықтарды мерекемен құттықтады.
«Біз - тәуелсіздіктің таңының куәгерлеріміз. Біз атом бомамынан бас тартып, тұрақтылықты ту еткен елміз. Қадірді ардагерлер, Отан соғысы жылдары отанымыз бен жерімізді жаудан қорғап қалып, қан майданда ерлік көрсеткендеріңіз елдің есінде мәңгілік сақталады. Ұлы Отан соғысының шежіресіне Мәншүк Мәметова, Әлия Молдағұлова, Қасым Қайсенов мен Мәлік Ғабдуллиннің, Бауыржан Момышұлы мен Талған Бегелдиновтің, Рақымжан Қошқарбаев пен Төлеген Тоқтаровтың, маңғыстаулықтар Исатай Сүйеубаев, Мәди Бегенов, Жұмағали Қалдықараев, Біләл Қалиев, басқа да мыңдаған батырлардың аты алтын әріппен мәңгілікке жазылды. Бүгін бізбен бірге жеңіс сарбаздары Сәуірбай Базарбаев, Бисен Боқаев, Ольга Заривняк, Қамқа Үмбеталина сияқты маңғыстаулық майдангерлер жеңісті мерекелеуде.
Ата-бабаларымыздың жанқиярлығы, отанға деген шексіз сүйіспеншілігі Қазақстанның бүгінгі жауынгерлері үшін же мақтан тұтарлық үлгі. маңғыстау облысында Ұлы отан соғысына қатысқан жиырма екі ардагер және тоғыз жүз жиырма сегіз тыл ардагері бар. Олар әр уақытта мемлекеттің қамқорлығында», - деп атап өтті Ералы Тоғжанов.
Бұдан соң «Мәңгілік полк» шеруі жүріп өтті. Туған жерді қасық қаны қалғанша қорғаған батыр бабаларының суретін ұстаған бір топ маңғыстаулық жүріп өткен соң Жеңіс күніне арналған шара мерекелік концертпен жалғасты.
«Мәңгілік полк» мәртебелі, айбынды.
Есте мәңгі мерекеде май күнгі.
«Мәңгілік полк» даңқы менен бабаның
жауды жеңген бізде қалған айбыны.
Жеңіс күні болып сапта, қатарда,
Кетсе де олар қайтпас мәңгі сапарға.
Ата, әке, ағалар мен бауырлар,
Қайтып келді жеңіс күні қатарға.
Камшат ОҢҒАЛТАЙ,
Суреттер мен видеоны түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
