Түпқарағанда еріктілер күніне 3 мыңнан аса маска тігіп жатыр

Түпқараған ауданының орталығы Форт-Шевченко қаласы мен барлық ауданға қарасты елді-мекеннің жастары мен ерікті тұрғындары маска тігіп, аудан тұрғындарын тегін медициналық маскамен қамтамасыз ету жұмыстарын бастап кетті, - деп хабарлайды mangystaumedia.kz сайты Түпқараған ауданы әкімдігінің баспасөз қызметіне сілтеме жасап.

Ел-жұрт дүрлігіп, дәріханаларда маска тапшылығы сезіле бастаған шақтағы қайырымды істі қолға алғандардың ішінде қоғам белсендісі, түпқарағандық Бибігүл Рамазанова да бар. Ол өз сөзінде жиырмаға жуық үйде отырған іскер тігінші әйелдерді жұмылдыруға күш салғанын, бүгінде тігіншілер күніне 3 мың маскаға дейін тігіп, халыққа тегін таратуға қауқарлы екендігін айтады.

Мұнымен қоса, ауданның еріктілер қозғалысының өкілдері мен «Zhas Prozhekt» жеңімпаздары да әшекейсіз маскаларды тұрғындарға тегін жеткізу ісін бастап кеткен. Олар халықты дүрлігуге бой бермей, сабырлыққа келуге, барлық игі іс бірліктің ғана арқасында жүзеге асатындығына үндеуде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.