Бүгін әлеуметтік желілерде Ақтауда науқас әйелді көрпенің төрт жағынан көтеріп машинадан түсіріп жатқан видео кеңінен тарап кетті. Сонымен қатар видеода әйелдің көршісі ауру әйелді ауруханадан "осындай халде" шығарғанына наразылық білдірген, деп хабарлайды mangystaumedia.kz
Оқиғаның мән жайын кардиолог дәрігер Әлия Байжановадан сұрап білдік. Белгілі болғандай қарт әйел ауруханадан шығарылғаннан кейін үйіне жеткізілген.
"Науқас алғаш рет 24 шілде күні ауруханаға жеткізілген. Алайда науқас провизорлық ауруханаға жатудан бас тартқан соң, ол үйіне жіберілген. Алайда науқас 26 шілде күні қайта жедел жәрдем шақыртқан. Науқас пневномия болуы мүмкін деген күдікпен ауруханаға жатқызылған. Сонымен қатар науқастың қант диабеті, артериялық гипертеза және олардан туындайтын басқа да көптеген аурулары болған. Алайда науқас ауруханада барлық емнен, тексерістен бас тартып, ылғи да айқайлап тосын мінез көрсетті. Оған барлық қажетті тексерістер, оның ішінде КТ да жасалды. Пневмония анықталған жоқ. Науқасты хирург, эндокринолог, невропотолог дәрігерлер де тиісті тексерістен өткізді. Науқас әр уақытта "өзіне укол салмауын, үйіне жіберуін" қайталады. Келінімен сөйлесіп, барлық жағдайды түсіндіргеннен кейін, ол науқасты үйіне алып кетті.
Айта кету керек, науқас ауруханаға түскен сәтте де, өздігінен жүре алмайтын күйде болды. Ол провизорлық станционардың көмегіне еш мұқтаж емес. Науқастың да, туыстарының да бізге шағымы жоқ. Біз науқасты ауруханадан шығарғанда каталкамен шығардық. Ары қарай келіні машинамен алып кетті. Ал оны үйіне апарғанда этажға көтеру үшін оны көрпемен көтерген болуы керек" дейді дәрігер.
Сонымен қатар, дәрігер науқасқа ары қарай тіркелген мекен жайына байланысты тиісті учаскелік дәрігердің көмегіне жүгінуі керек екенін айтты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
