Мұнайлы ауданында ескі үйлердің шатыры жаңартылды

Биыл Мұнайлы ауданының орталығы, Маңғыстау ауылындағы екі қабатты 12 үйдің қасбеті мен шатыры жөнделді.

Атап айтсақ, 16, 17, 18, 19-шы үйлерге жөндеу жұмыстары мамыр айының басында басталып, тамызда біткен болатын. Үйлердің қасбеті тұрғындардың сұранысы бойынша сары түске боялып, шатыры металлға ауыстырылды.

- Осыған дейін тұрғындардың сұранысымен жобалық-сметалық құжаттама жасақталып, бюджеттік өтінім берілген болатын. Ол қолдау тауып, қаражат бөлінді. Мемлекеттік сатып-алу конкурсында мердігер мекеме “ҚазСтройГрупп” ЖШС жеңіп алып, 16, 17, 18, 19-үйлердің жөндеуін аяқтады. Әрі қарай ескі үйлердің сыртын жаңарту жалғасты,-деді ТҮКШ бөлімінің сектор меңгерушісі Мақсат Созақбаев.

Қазан айында #2,3,4,5, 6, 8, 10-үйлерге де жөндеу жұмыстары басталды. Мердігер мекеме “Ясира групп” ЖШС қызметкерлерінің айтуынша, қазіргі таңда құрылыс жұмысы 90%-ке аяқталып, бітіп тұр.

Аталған өзгеріске тұрғындар дән риза. Олар көптен бері жаңартуды сұрағанын айтады.

- Жаңбыр кезінде үйден су кететін еді. Үнемі жаңбыр жаумаса екен деп тілейтінбіз. Енді міне, уайым болмайды. Жалпы, бірнеше жылдан бері жөндеу көрмеген үйлер ғой. Әкімге ризамыз,-деді тұрғын Айткүл Жұбанова.

Құрылыс барысын аудан әкімі Ержан Күмісқалиев үнемі қадағалауда ұстады. Ол мердігер мекеме басшысы және ауыл әкіміне жұмыстарды тиянақты, сапалы жасауды, уақытына сәйкес бітіруді тапсырған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.