Әне-міне дегенше жыл айналып, қыс аяқталып, шуағын төккен көктем де келді. Өлке жұртшылығына аян, қыстың соңғы күндері қар жауып, қаһарын көрсеткен болатын. Алайда наурыз айы басталысымен жауған қар еріп, көктемнің алғашқы күнін Алғыс айту күнімен қарсы алдық. Көктемді қанатына қондырып, жан жылуын көкірегіне қондырып, аналардың дәстүрлі 8 наурыз мерекесі де жақындады. Көктемнің алғашқы мерекесі ананың аялы алақанындай жүректерге жылулық ұялатады. Адамзаттың нәзік жандарына арналған мереке табиғаттың оянуымен бірге келіп отыр.
Ана – тіршіліктің қайнар көзі, махаббаттың шуақ күні, мейірімнің кәусар бұлағы. Ананы ардақтамайтын халық жоқ. Нәресте өмірінің нәрі – ана сүті. Халықтың рухы, жаны, тарихы, арман үміті болып табылатын тілдің де басқаша емес, ана тіл деп аталуы тегін емес. Бұл – ұлттың тілі, ғұрып – салты, дәстүрі, тарихы, әдебиеті мен мәдениеті жас ұрпақ бойына ана сүтімен дариды деген сөз. Ардақты аналарымыз бен қымбатты апа-қарындастарымыздың осы бір тамаша мейрамы көктемнің келуімен тұстасып жатады. Осынау көктемнің жайма-шуақ күнінде көңілдерді жадыратып, нәзік жанды аруларымыздың жүректеріне жан жылуын сыйлайтын мерекенің мәртебесі қашанда биік. Қай кезде де әрбір халық үшін әйел жанының жылулығы мен сұлулығы, мейірімділігі мен кеңдігі әлемге рух беріп келеді.
Әсемдік әлемінің үлгісіндей сұлу да сымбатты қалпын сақтай отырып, шаңырақтың шырайын келтірер Отанасы, аяулы ана, адал жар, үлгілі қызметкер болуды қатар алып жүр. Өңіріміздің нәзік жандылары да барлық саланы: кәсіпкерлік пен саясат, білім мен денсаулық, ғылым мен өнерді еркін меңгеріп, жетістіктерімен қуантуда. Әсіресе ауданның ақ халатты нәзік жандылар қауымының халық денсаулығы үшін атқарған қызметтері тіптен бөлек. Өзім ауданның депутаты және денсаулық саласының маманы ретінде барлық ақ халаттыларды, қызметте қатар жүрген нәзік жанды әріптестерімді шын жүректен құттықтаймын.
Баршаңызға асыл армандардың орындалуын, жан жадыратар қуаныштың мол болуын, отбасы бақыты мен берекесі сарқылмауын, денсаулықтың мұқалмауын тілеймін!
Байқадам ҚҰСЫМБАЕВ,
аудандық мәслихаттың депутаты
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
