Амал және Наурыз мерекесінің ең басты айшықтары бейбітшілік пен достықты нығайту, ұлттық құндылықтарды дәріптеу, қайырымдылық аясын кеңейту, табиғатты аялап, қоршаған ортаға ұқыпты қарау көзқарасын дамыту екендігі баршамызға белгілі. Мереке мерейін көтеруге бағдарланған іс шаралар ҚР Президенті Қ.Тоқаевтың ұсынысы бойынша әзірленген наурыз мерекесін өткізу тұжырымдамасы мен Тәуелсіздіктің 30 жылдығы аясында атқарылатын игі істерге сәйкес келеді.
Биыл ауданда ұлтымыздың ұлық мерекесі Амал мен Наурызды мерекелеуге арналған іс-шараларды карантиндік талаптарды толық сақтай отырып ұйымдастыруға баса назар аударылып отыр.
«Бірінші байлық - денсаулық» дейді халқымыз. Бір жылдан бері әлемді шеңгелдеп тұрған аты жаман індеттің қайта өрши бастағаны бәрімізге белгілі. Сондықтан ұлттық мерейлі мерекемізді атап өту кезінде індеттен сақтану шараларын сақтауға баса мән бергеніміз жөн. Осы тұрғыдан 14 наурыз – Амал күні аудан орталығындағы Тәуелсіздік алаңында жергілікті өнерпаздардың «Амал келді - жыл келді» атты гала-концерті сақтық шараларын сақтаған жағдайда ұйымдастырылып, тұрғындар мен қонақтарға мерекелік тамаша көңіл-күй сыйлады. Мерекеге орай аудандағы жасөспірімдер кітапханасында өткен «Жаңа өмір, жаңа жыл, жаңа күн» атты әдеби-сазды шара, облыстық Ә.Кекілбаев атындағы өлкетану музейінің аудандық филиалында және оның ауылдардағы көрме залдарында өткен шаралардың барлығы қарантиндік талаптарды сақтаған жағдайда өтті.
Жоғарыда жазып өткеніміздей, Амал және Наурыз мерекесін атап өтудің жас ұрпаққа берер өнегесі мол. Ежелден ұлы даланы сәнге бөлеп тойланып келе жатқан ұлтымыздың ұлық мерекесі ел тыныштығын нығайтып, ағайынның амандығына көңіл бөлуге үндейді. Ұлтымыздың осы болмысы ғасырдан ғасырға жалғасып келе жатыр. Амал күні «Амал келді - жыл келді», «Ұлыс оң болсын, ақ мол болсын», «Жас құтты болсын» деп ақжарма тілектер ақтарылып, құшақ айқастырып, төс түйістіріп көрісу бұл сөзімізге дәлел болады. Мереке күндерінде ұлттық құндылықтарды офлайн және онлайн-форматтарда дәріптеп, қолөнер, салт-дәстүр, әдет-ғұрпымыздың жарқырап көрінуі жас ұрпақ үшін тұнып тұрған өнеге. Халқымызда жақсылық жасау, қайырымдылық көрсетуге байланысты айтылған асыл сөздер ұшан-теңіз. Бұлардың барлығы – халқымыздың ұрпақтан ұрпаққа ауысып келе жатқан құнды мұрасы. Аталар салған сара жолмен жүруді мұрат тұтқан бүгінгі ұрпақ жақсылық жасап, қайырымдылық көрсету өрісін жылдан-жылға кеңейтуде. Мұндай игі істердің ұлық мереке күндерінде ерекше түс алатыны баршамызға аян.
Ұлы дала төсінде көшпенділікте өмір сүрген ата-бабаларымыздың асыл өнегесінің бір асыл көрінісі – табиғатты аялау. Наурыз мерекесін мерекелеу кезінде ұлтымыздың осы қасиеті жарқырап көрінбек. Табиғаттың тазалығын сақтауды мұрат тұтқан азаматтар мерекелік күндерде ауыл ішінің тазалығына назар аударып, сенбілік жұмыстарды қолға алуда. Айта берсек, ұлыстың ұлы күнін ұлықтайтын осындай игі істер аз емес. Ең бастысы – әлемді бір тарының қауызына сыйғызған індеттен сақтану шараларына баса мән бергеніміз жөн.
Ұлыстың ұлы күні – Наурыз баршаға құтты болсын, ағайын!
Қартбай ҚОЖАЕВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
