Бейнеуде 40 жыл ұстаздық еткен мұғаліммен кездесу кеші өтті

Сарға ауылындағы «Бейнеу мектеп-интернаты» - Бейнеу ауданындағы шалғай ауылдар мен әлеуметтік осал топтардағы отбасылардың 140-қа жуық ұл-қыздары заманауи білім мен тәрбие алып жүрген бірден-бір арнайы оқу орны.  Ұжымда ұстаздар мен шәкірттер қауымын биік белестерге бастап жүрген тәжірибелі, білімді, білікті ұстаздарды құрметтеп, зор ілтипат көрсетуге ерекше мән беріледі. Жуырда мектеп-интернатта ұлағатты ұстаз, еліміздің Білім және ғылым министрлігінің Құрмет грамотасы, облыс пен аудан әкімдерінің Алғыс хаттарымен марапатталған, «Тәуелсіздікке 25 жыл» медалі мен «Бейнеу ауданына 45 жыл» төсбелгісінің иегері Айжақсы Жетпісованың қырық жылға жуық оқытушылық қызметінің өнегесіне арналған «Ұстаз жолы» атты шығармашылық шара ұйымдастырылды.

Шараға мектеп-интернат ұжымы, Айжақсы Жетпісованың өзі оқытқан шәкірттері, замандас әріптестері мен қатар туыстары, оқушылар  қатысып, қуанышымен бөлісті.

Ұстаздық  жолында  бар ғұмырын шәкірт тәрбиелеумен қатар білім саласына арнаған ұлағатты ұстаздың өнегелі ғұмырынан сыр шертетін бейнекөрсетілім көпшілік назарына ұсынылды. Сонымен қатар кеш барысында Айжақсы Бегейбайқызының ұжымдастары мен туыстары, шәкірттері ұстазы туралы ой бөлісіп, ізгі тілектерін арнады.

Айжақсы апай оқушылары мен жас педагогтарға өзінің студенттік қызыққа толы шақтары мен елеулі сәттерін, алғашқы еңбек жолынан сыр шертіп, білім саласындағы жеткен жетістіктері туралы баян етті.

Мектеп оқушылары құрметті мамандыққа деген қызығушылығын білдіріп, көкейінде жүрген сұрақтарын қойып, тұшымды жауаптарын алды.

Кеш барысында талантты, дарынды өнерпаздар ұлағатты ұстаздарға арналған әндер орындап, қонақтарға көтеріңкі көңіл күй, қуаныш сыйлады.

  Үміт ҚАЗДАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.