«Worldskills Aktau»: оң нәтижелер

«Хан-Шахар» салтанат сарайында жұмысшы мамандығының «Worldskills Kazakhstan» кәсіптік шеберліктің өңірлік конкурсының қорытынды шарасы өтті. 1–5 сәуір күндері 18–22 жас аралығындағы студенттер, колледж бітірген түлектер, жас жұмысшылар мен мамандар бәсекеге түсіп, өз біліктіліктерін байқатты. Маңғыстау облысы әкімдігінің қол­дауымен өткен «WorldSkills Ak­tau» өңірлік чемпионатын білім басқармасы жоғары деңгейде ұйымдастыр­ды. «WorldSkills Aktau» өңірлік чемпионаты облыстың техникалық және кәсіптік білім беру ұйымдары арасында 37 құзыреттілік бойынша өтті. Байқау ережесіне сәйкес әр құзыреттілік бойынша өңірлік чемпионат­ты өткізу алаңдары бекітілді. Сондай-­ақ құзыреттіліктер бойынша сарапшылар тізімі жасақталып, олар чемпионат тапсырмала­ры мен алаңдарға қойылатын талаптарды талқылап, әзірледі. Байқаудың қорытынды жиынына қатысқан облыс әкімінің орынбасары Руслан Сәкеев жастарды жаңа заманға сай білімді меңгеріп, кәсіп игеруге шақырды. «Құрметті чемпионат қатысушылары, са­рапшылары, қонақтары! Төрт күн бойы өткен жиынның қорытындысына да жеттік. Мен де сіздер секілді студент болдым, оқу орнын­да білім алдым. Кәсіптік техникалық білім сапасын көтеру бойынша бұл байқаудың қоғам үшін, біздің Маңғыстау өңірі үшін де маңыздылығы ерекше. Тұңғыш Прези­дент– Елбасы Нұрсұлтан Назарбаев «Жастар жылын» жариялағанда жастардың білім деңгейін халықаралық деңгейге көтеру қа­жеттігін баса айтқан еді. Міне, бұл чемпионат осы мақсаттан шығуды көздейді. Біздің өлке жастары былтыр республикалық чем­пионатта жеңімпаздар атанғанын білесіздер. Тағы бір айта кететін жайт, биыл біздің об­лыста қосылған «Zhas Project» жобасы ая­сында 14 –29 жас аралығындағы кәсіп аша­мын деген жастарға 1 миллион теңгеге дейін гранттар беріледі. Осы мүмкіндікті сіздерге пайдалануға шақырамын. Бүгінгі өңірлік байқауда жобаларын ұсынған жастарға да бұл жоба үлкен мүмкіндіктер береді. Өйткені сіздер – Маңғыстаудың білімді де дарынды жастарысыздар», – деді Руслан Сәкеев. Маңғыстау облысы бойынша техникалық делегат М.Измухамедов биылғы байқаудың ерекшеліктерін атап өтті. «Аймақтық байқау ұйымдасқан түрде, жоғары деңгейде өтті. Бұған дейінгі жыл­дардағы конкурстарға қарағанда әлдеқайда қызықты, тартысты, бәсекеге толы болды. Жастар жарыста жоғары нәтиже көрсете білді. Әр сала бойынша сайыс өтетін алаңдар жақсы әзірленді. Салаға қатысты инфрақұрылым­дық парақшаларда көрсетілген заманауи құрал­-жабдықтар, биылғы сарапшылар да тыңғылықты дайындалған. Құрама команда алдағы қазан айында елордада өтетін Ұлттық чемпионатқа барады. Осы чемпионатқа са­палы дайындық жасау үшін Ресейде өтетін конкурсқа мамыр айында тәжірибе ал­масу, біліктілік шыңдау үшін барады. Ал «EuroSkills» халықаралық чемпионаты 2020 жылы Австрияда, 2021 жылы Шанхайда ұйымдастырылады», – дейді делегат. «WorldSkills Aktau» өңірлік чемпионатының құзыреттіліктері бойынша чемпионатты өт­кізуге демеуші ретінде және алаңдармен қамтамасыз етуге 9 мекеме, кәсіпорындар, 8 кол­ледж және 1 балабақша тартылды. Жастар үшін маңызы зор шараға Маңғыс­ тау облысының «Атамекен» кәсіпкерлер па­латасы мен бизнес қауымдастығының, үкі­меттік емес ұйымдардың өкілдері, әлеуметтік серіктестер және облысымыздың ірі кәсіп­ орындарының басшылары, техникалық және кәсіптік білім беру ұйымдарының басшыла­ры, 251 конкурсант, 150 сарапшы, компатриот сарапшылар және демеушілер қатысты. «Атамекен» кәсіпкерлер палатасының ай­мақтық филиалы, «Бизнесті қаржысыз қол­дау» бөлімінің басшысы Аққу Айтжанова өңірлік конкурсқа енген кәсіпкерлік бағыты бойынша жастардың бизнес жобалары тура­лы айтып берді. «Біздің филиал биылғы конкурсты ұйым­дастыру істеріне белсене ат салысты. Оның ішінде кәсіпкерлік бағытындағы жарыстарға баса назар аудардық. Біз, мектеп оқушылары, колледж студенттері арасында бизнес идея­ларға қатысты конкурс жасадық. Олар өз бизнес идеялары туралы жұмыстарын қорға­ды. Өте қызықты, жақсы жобалар болды. Жастардың жақсы дайындық жасағандары таңғалдырды. Оларға жетекшілік еткен мұ­ғалімдеріне алғыс айтқым келеді. 8 колледж­ден қатысқан жастар кәсіпкерлік стартап бизнес жобаларын ұсынды. Бұл сегіз жоба идеяларын кәсіпкерлік саласында қолдануға болады деп айта аламын. Тек қаржылай көмек көрсетілсе болғаны», – дейді Аққу Айтжанова. Биылғы «WorldSkills Aktau» өңірлік чем­пионаты 37 құзыреттілік бойынша арнайы әзірленген 18 жерде ұйымдастырылды. Со­нымен қатар облысымызда алғашқы рет есту қабілеті нашар студенттерге арналған «DeafSkills» чемпионаты Ақтау техноло­гиялық қызмет көрсету колледжі базасында өтті. Колледжішілік чемпионатқа қатысып жеңімпаз атанған 251 студент «WorldSkills Aktau»  өңірлік чемпионатына қатысып, кә­сіптік шеберліктерін сынады. Озық отандық және халықаралық тәжі­рибеге сүйеніп, студенттерге кәсіби бағдар беру, кәсібіне икемдеу, жұмысшы маман­дықтарын дәріптеу, қазіргі және болашақ кәсіби құзыреттіліктерін игеру үшін жаңа мүмкіндіктер жасау мақсатында WorldSkills қозғалысының құрамдас бөлігі негізінде «FutureSkills Аktau» чемпионаты техникалық және кәсіптік білім беру ұйымдарының 15­-17 жас аралығындағы студенттер арасын­да 10 құзыреттілік бойынша өтті. Жиын қорытындысында барлық құзыреттілік бо­йынша байқауда жеңімпаз атанған жастар ма­рапатталып, дипломдар табысталды.

Жайық НАҒЫМАШ