«Жаңашылдықпен - Жаңаөзенге» жастар сапары

19 маусым күні қаламызға «Жаңашылдықпен - Жаңаөзенге» атты жастар сапары аясында Маңғыстау облыстық жастар саясаты мәселелері басқармасының басшысы Бауыржан Тұяқов, Маңғыстау облыстық жастар ресурстық орталығының директоры Досан Жеткізген мен аталған орталықтың жастар жобалары және шығармашылық бөлімінің басшысы Мұқаш Бекенұлы, сондай-ақ МО жастар ресурстық орталығының мамандары және ерікті жастары келді.

Аталған шара Маңғыстау облыстық жастар ресурстық орталығының бастамасымен Жаңаөзен қалалық жастар ресурстық орталығының ұйымдастыруымен өткізілді.

Қонақтарды қарсы алу рәсімінен кейін МО жастар ресурстық орталығының директоры Досан Жеткізгеннің жүргізуімен «Болашаққа сеніммен» жобасы аясында «Жастар орталықтарының қызметі: жаңашылдық пен жетістік» тақырыбында қалалық жастар ресурстық орталығының мамандарына арналған оқыту шарасы өтті. Бұл жерде тәжірибелі мамандар жастардың біліктілігін арттыру бағытында кеңестерін беріп, жұмысты дұрыс жүргізу, іс-қағаздар толтыру тәртібі және т.б. бойынша түсінік жұмыстарын жүргізді.

Одан кейін қонақтарға Жаңаөзен қалалық жастар ресурстық орталығының жанынан құрылған «Еріктілер корпусының» жобасы таныстырылып, салтанатты ашылу рәсімі өтті.

Айта кету керек, «Еріктілер корпусы» республика бойынша үздік 35 жобаның қатарына енген. Жаңаөзендегі корпус еліміз бойынша Ақтау қаласынан кейін екінші болып ашылып отырған жоба.

«BOOKDATING» форматындағы кездесу

«Жаңашылдықпен - Жаңаөзенге» жастар сапары түстен кейін «JASTAR BOOKS» жобасы аясында «BOOKDATING» форматындағы кездесумен жалғасты.

«Бастау» қонақ үйінде аталмыш шарада Маңғыстау облысы жастар саясаты мәселелері басқармасының басшысы Бауыржан Тұяқов жастарға кітап құндылығы туралы айта келе, өзі оқыған қызықты әрі пайдалы шығармалар жайында әңгімеледі, жастардың тұлға болып қалыптасуында, дұрыс тәлім-тәрбие алуында кітаптың, әдеби шығармалардың рөлі зор екендігін атап өтті.

Одан кейін спикер ретінде арнайы шақырылған О.Тұрмағанбетұлы атындағы Маңғыстау индустриалды техникалық колледжінің әдіскері Фатима Салқынбаева жастарға өзінің өмірлік жолының қалыптасуында мықты мотивация беріп, зор ықпал еткен кітаптар жайында айтып, Жаңаөзен қалалық жастар ресурстық орталығына аталған колледж ұжымының атынан Маңғыстау тарихындағы географиялық және этномәдени зерттеулер жайындағы кітабын сыйға тартты.

Кездесу барысында жастар өздерінің сүйікті кітаптары мен авторлары туралы әңгімелеп, өздерін қызықтырған сұрақтарға жауап алды.

Ұлт болашағы жастардың рухани сауатын арттырып, ұлттың ұлағаттылығын сақтауды мақсат еткен басқосудан жастар керемет көңіл-күйде тарқасты.

Драмалық шығармалар сахналанды

Облыстық белсенді жастардың Жаңаөзенге сапары қалалық Оқушылар шығармашылық үйінің концерт залында «Ақ жол» әуесқой жастар театрының қойылымдарымен қорытындыланды. Театр әртістері драматург, ұстаз Өтен Ахметтің «Ананың ақ сүті» және Асылбек Әуәсханұлының «Адасу» атты драмалық шығармаларын сахналады.

Әлия Исаева бастаған «Ақ жол» әуесқой жастар театры бүгінгі таңда өзекті тақырыпқа айналған дін мәселесін қозғай отырып, отбасылық құндылықтарды, ата-ананың қадірін білуді насихаттайтын қойылымдары арқылы театр сүйер қауымға ұмытылмас рухани кеш сыйлады.

Айжан НАСЫРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.