Зияткерлік мектепке қариялар қонаққа келді

©

Ақтау қаласындағы Назарбаев Зияткерлік мектебіне Маңғыстау облыстық қарттар мен мүгедектер үйінің тұрғындары қонаққа келді. Оларға мектеп оқушыларының өзін-өзі басқару ұйымы және «Мейірім өскіні» қайырымдылық ұйымының еріктілері құрмет көрсетті. Кездесу барысында ата-аналар дастархан жайып, өнерпаз шәкірттер концерт қойды. Оқушылар қариялар құрметіне әдемі әндер мен билер орындап, олармен дастархан басында әңгіме-дүкен құрды. Кейін қариялар мектеп акт залында жағалай орналасқан қолөнер  түрлері орналасқан көрмені тамашалады. Гобелен, тігін, суға сурет салу, құммен сурет салу, папье-машье, графика, батик сынды өнер түрлерін өз қолдарымен жасап көрген олар балаларға ризашылығын білдіріп, бата берді. Айта кетейік, 2016 жылдың қазан айында білім ордасында зияткерлік мектептің 10-сынып оқушыларының бастамасымен «Мейірім өскіні» қайырымдылық ұйымы құрылған еді. Жас қамқоршылар облыстық қарттар үйіне, мүжәлсіз отбасыларға және т.б көмекке мұқтаж жандарға көмек көрсетумен айналысып келеді. Сонымен қатар, басқа да қайырымдылық қорларымен бірлесе жұмыс істейді. Қор мүшелері биыл да аталары мен әжелерін ұмытқан жоқ. Өткен оқу жылдарында қариялар үйіне өздері барса, биыл оларды білім ордасына шақырып, қонақ қылуды жөн санапты. - Ақсақалдарды білім ордасына қонақ қылумыздың өз мәні бар. Алдымен, оларды зияткерлік мектеппен таныстырып, қазіргі таңда білім берудегі жетістіктерді көрсету. Ал екінші жағынан, басқа да оқушылардың қариялармен танысқанын, тілдескенін қаладық, - дейді мектеп директорының тәрбие ісі жөніндегі орынбасары Алтынзер Ихсанова. Мазмұны бай  кездесуде ақсақалдар зияткерлерге өздерінің өмір жолын баяндады.  Заманында дәрігер болып, шетелдерді көрген, қазіргі қариялар үйінің тұрғыны  Эдуард Багирян: - Менің отбасым бар, олар елге қайтып кетті. Мен қазақ халқының пейілі мен қонақжайлығын қимай, осында қалып қойдым. Әлемнің біршама елін көрдім, бірақ қазақтың дастарханындай қонақжайлықты еш жерден кездестірмедім. Қазақ бала тәрбиелеуде де көп елге үлгі бола алады. Сендерден тамаша ел басқарушылар өсіп шығады, мен оған сенімдімін, - деген өзекжарды ойларын ортаға салды. Кездесу соңында ата-аналар мен оқушылар келген қарияларға естелік сыйлықтар табыс етті. - Жыл сайын бұл кісілерге мерекелерде концерт қойып көңілдерін көтеру мектеп оқушыларының басты мақсатына айналған. «Мейірім өскіні» ұйымының жыл сайынғы бастамаларына өзін-өзі басқару ұйымының оқушылары белсенді қатысады. Ақсақалдарымызбен жүздескен сайын, көптеген өнеге аламыз. Өзімізге-өзіміздің сеніміміз артады. Көріскен сайын қуанамыз. Бүгін де керемет кездесу болды. Енді оларды сағынатын боламыз, - дейді мектептегі өзін-өзі басқару ұйымының Президенті Райымбек Ақкөлұлы.

Ақтау қаласы химия-биология

бағытындағы Назарбаев Зияткерлік

мектебінің баспасөз қызметі

[gallery td_select_gallery_slide="slide" ids="39146,39148,39147"]