Өнер мектебінің оқушылары байқаудан табысты оралды

Алматы қаласындағы «Алатау» дәстүрлі өнер театрының құрылғанына жыл толуына, сонымен қатар Қазақстанның еңбек сіңірген қайраткері,әнші Сәуле Жанпейісованың жетекшілігімен ашылған «Аманат» өнер орталығының бір жылдығына орай «AMANAT musiс» халықаралық конкурс-фестивалі өтті. 

Конкурс-фестивальдің «Аманат» өнер орталығы, «Алатау» дәстүрлі өнер театрының қолдауымен ұйымдастырылған өнер байқауының жеңімпаздарын сараптауға ҚР еңбек сіңірген қайраткер Сауле Жанпейісова жетекшілік жасап, ҚР еңбек сіңірген қайраткер күйші Нұркен Әшіров, республикалық А. Жұбанов атындағы мамандандырылған саз мектебінің ұлт-аспаптар бөлімі меңгерушісі, ҚР еңбегі сіңген мәдениет қайраткері, атақты әнші Өмірқұл Айниязов, Венгрияның Қазақ-мазар мәдениет, тіл және білім орталығының жетекшісі Оңайша Мандоки, Саха республикасының мемлекеттік эстрада театрының жеке орындаушысы Юлиана Кривошапкина, Қырғыз Республикасының мәдениет қайраткері продюсер, әнші Қайрат Салмакеев қазылық етті.

Конкурс мақсаты - өзара достық қарым-қатынас қалыптастыруына жол ашу; дарынды жастарға шығармашылық қолдау көрсету; патриоттық, азаматтық, мәдени-эстетикалық тәрбиелеу; дарындының даралығын насихаттау; қатысушылардың шығармашылық әрекеттерінің түрлері мен бағыттарын дәріптеу мақсатында өткізілген өнер байқауына қатысушылар дәстүрлі ән, жыр-терме (ұлттық аспап сүйемелімен жеке орындау), халық аспаптарында жеке күй орындау; эстрадалық вокал (жеке орындау), халықтық ансамбльдер (дуэт, трио, квартет, т.б. 15 адамға дейін) номинациялары бойынша өзара бақ сынасты.

«Аманат music» халықаралық конкурс фестиваліне Абыл Тарақұлы атындағы балалар өнер мектебінің ұлт аспаптар бөлімінің күй және ән-терме номинациясы бойынша бірнеше талапкер байқауға қатысып, бірқатары жүлдемен оралды.

Атап айтсақ, күй номинациясы бойынша (орта топ) - Роберт Бердібек бас жүлдеге, ән-терме номинациясы бойынша (үлкен топ) Айнұр Сақабанова лауреат, (жетекшісі: ҚР еңбек сіңірген қайраткер Рухия Махмутқызы Батыршева), ән-терме номинациясы бойынша (орта топ) Диляра Қаржаубаева бас жүлдеге ие болды.

Байқауға қатысқан Сұлтан Омарұлы, Абзал Нағим, Досымжан Жаңаберген, Меруерт Рахметова (жетекшісі: Эльмира Сланова)  I дәрежелі дипломант атанып қайтты.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.