Ақтау аумағындағы электр желілерінің ағымдағы жағдайы, халықты жарықпен қамту және қызмет көрсету сапасына қатысты мәселелер кеңесте талқыға түсті, - деп хабарлайды mangystaumedia.kz сайты Қоғамдық коммуникация орталығына сілтеме жасап.
Басқосу Қазақстан Республикасы энергетика министрлігі табиғи монополияларды реттеу комитетінің Маңғыстау облысы бойынша департаменті бастамасымен ұйымдастырылды.
Кеңеске Маңғыстау облысындағы табиғи монополияларды реттеу департаментінің басшысы Жандос Сәлімов, Маңғыстау облысындағы табиғи монополияларды реттеу департаменті басшысының орынбасары Лаура Бимурза, «Ақтау электр желілері басқармасы» мемлекеттік коммуналдық кәсіпорнының директоры Ақилен Сәрсенғалиев, Ақтау қалалық тұрғын үй-коммуналдық шаруашылық бөлімінің сектор меңгерушісі Бақтияр Мақсатов, сондай-ақ Ақтау қалалық тұрғын үй-коммуналдық шаруашылық бөлімінің сектор меңгерушісі мен өкілдері және электр қуатын тұтынушылар қатысты.
Жиналыста бекітілген инвестициялық бағдарламаны іске асыруда ашықтықты талқылау және қамтамасыз ету жай-күйі сөз болды. Бұл бағдарлама «Ақтау электр желілері басқармасы» компаниясы меншігіндегі нысандарды жаңғыртуға, қайта қалпына келтіруге және жаңартуға, сондай-ақ тұтынушыларды тарифтерден алынатын қаражаттың мақсатты пайдаланылуы туралы хабардар етуге бағытталған.
«Ақтау электр желілері басқармасы» МКК басты миссиясы тұтынушыларды үздіксіз электрмен жабдықтауды, электр желілері мен қосалқы станцияларды пайдалануды сенімді қамтамасыз ету.
Ұйым электр желілерін қайта құрумен және техникалық жаңартумен белсенді айналысады.
Кеңес барысында «Ақтау электр желілері басқармасы» МКК директоры Ақилен Сәрсенғалиев кәсіпорынның электр желілерінің жай-күйі туралы ақпарат берді. Оның айтуынша, қазіргі таңда электр желілерінің 70%-ы тозған. Апатты жағдайлардың алдын алу, халықты электрмен жабдықтау сапасын арттыру және желілердің тозуын азайту үшін инвестициялық бағдарламаға сәйкес биылг 5800 метр тозған кабельдерді ауыстыру жоспарлануда.
Сонымен қатар жиында қатысушылар кәсіпорын қоймасында бар кабельдік өнімдердің ассортиментімен танысты.
Монополияға қарсы комитеттің өкілдері нормативтік құжаттардың бар-жоғын және сәйкестігін тексерді. Жиналыстан кейін объектілердің біріндегі кабельдік желілерді ауыстыру бойынша жұмыс барысына шолу жасалды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
