Республика күні қарсаңында "AMANAT" партияcының салтанатты іс-шарасы өтіп, партия төрағасы Ерлан Қошанов еліміздің түкпір-түкпіріндегі үздік мамандар мен еңбек ардагерлерін марапаттады, деп хабарлайды mangystaumedia.kz сайты партияның бапасөз қызметіне сілтеме жасап.
"AMANAT" партиясының Маңғыстау облыстық филиалы 2019 жылдан бастап партияға мүше болған Ербол Кенжеваловты ұсынып, партия басшылығы ұсынылған азаматты салтанатты түрде марапаттады. Ербол Кенжевалов – Маңғыстау облысында жаңа туылған нəрестеден бастап 18 жасқа дейінгі балаларды емдейтін балалар нейрохирургия саласы бойынша жалғыз маман. Ол – бас, ми жарақаты, жедел қан айналым бұзылысы, инсульт, балаларда туа бітті гидроцефалия, ми жұлын жарығы диагноздарына 1000-нан аса ота жасаған үздік хирург. Оның облыс медицинасына қосқан үлесі жетерлік. Өңірдегі шалғай аудан-қалаларда ауыр халде жатқан науқастарға жедел-жəрдем көлігімен, ұшақпен барып ота жасайды. Атап айтсақ, 2022 жылы Жетібай ауылындағы футбол қақпасы құлап, ауыр жағдайға түскен 10 жасар балаға ота жасап, ажалдан арашалады. Ал Жаңаөзенде екінші қабаттан құлап, бас-мидың ауыр жарақатын алған 1 жасар балаға жедел көмек көрсетіп, бірнеше сағатқа жалғасқан отаны сәтті аяқтады. 2019 жылы Ақтау қаласындағы теңіз жағалауындағы тастардан құлаған 4 жасар балаға жасалған операция да сәтті өтті. Бүгінгі таңда Маңғыстау облысы бойынша инсульт алған балаларға сирек оң нәтижемен аяқталатын операциялар да сәтті жасалуда. Е.Кенжевалов бүгінгі күнге дейін Маңғыстау облысы перзентханасында жаңа туылған сəбилерге 300 ден аса ота жасаған.
Сонымен қатар Е.Кенжевалов салауатты өмір салтын ұстанады. 1997 жылдан бері Грек-рим күресінен облысаралық, республикалық турнирлердің жеңімпазы, спорт шеберіне үміткер. Бүгінгі күні Ақтау қаласындағы «Мұнайшы» спорт кешенінде жас буынға бапкер қызметін қоса атқарады.
Хирургтың марапаттары да жетерлік. Мәселен, Денсаулық сақтау министрінің «Алғыс» хаты(2011ж.), Қоғамдық марапаттар жөніндегі Республикалық кеңесінің «Медицина саласының үздігі» медалі (2020 ж.), Қазақстан Республикасының Денсаулық сақтау министрлігінің «Денсаулық сақтау ісінің үздігі» төсбелгісі (2022 ж.) бар.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
