Маңғыстаулық 264 оқушы республикалық пәндік олимпиада жүлдегері атанды

«Достық» үйінде жалпы білім беретін пәндер бойынша республикалық олимпиаданың облыстық кезеңінің жабылу салтанаты өтті, деп хабарлайды mangystaumedia.kz облыстық білім басқармасына сілтеме жасап.

9-11 сынып оқушылары арасындағы облыстық пәндік олимпиада 13-18 ақпан аралығында өткізілді.

Олимпиада жаратылыстану-математикалық және қоғамдық-гуманитарлық пәндер бойынша барлығы 15 пән бойынша ұйымдастырылды.

Олимпиадаға облыстың 665 оқушысы қатысып, 156 оқушы ІІІ орын, 66 оқушы ІІ орын, 42 оқушы І орынмен марапатталды. Барлығы 264 оқушы жеңімпаз атанды.

«Ең үздік қала мектебі - 2023» номинациясымен Ақтау қаласы мамандандырылған ІТ лицейі;

«Ең үздік ауыл мектебі -2023» номинациясымен Мұнайлы ауданы Шоғы Мұңалұлы атындағы №5 жалпы білім беретін мектебі;

«Ең үздік ауыл оқушысы - 2023» номинациясымен Мұнайлы ауданы Шоғы Мұңалұлы атындағы №5 жалпы білім беретін мектептің 11-сынып оқушысы Тұрсынбаева Ақгүл;

«Ең жас қатысушы - 2023» номинациясымен «Білім-инновация» лицейінің 7-сынып оқушысы Дарябай Жандос;

«Абсолюттік чемпион - 2023» номинациясымен «Білім-инновация» лицей-интернатының 11-сынып оқушысы Ернар Дүзелбай мен Ақтау қаласы №1 жалпы білім беретін мектептің 11-сынып оқушысы Зарина Нысанбекова марапатталды.

Қоғамдық-гуманитарлық бағыттағы пәндер бойынша «Ең үздік олимпиадалық команда -2023» - Ақтау қаласының командасы, жаратылыстану-математикалық бағыттағы пәндер бойынша «Ең үздік олимпиадалық команда -2023» - «Білім-инновация» лицейінің командасы атанды.

Үздік деп танылған 3 жеңімпаз оқушыға Ш.Есенов атындағы Каспий мемелекеттік технологиялар және инжиниринг университетінің білім гранттары берілді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.