Маңғыстау облысында 8 айда 102 683 әкімшілік құқық бұзушылық тіркелді. Ең көп хаттама жол ережесін бұзғандарға қатысты – 70216, деп хабарлайды mangystaumedia.kz сайты облыстық жол полициясына сілтеме жасап.
Қоғамдық тәртіпті бұзу бойынша 32 063 жағдай анықталды. 4225 іс әкімшілік сотқа жолданды.
Есепті кезеңде болған оқиғалар туралы азаматтардың өтініштері мен хабарламалары бойынша ҚР ӘҚБтК-нің 505-бабына сәйкес, қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру бойынша 5369 хаттама толтырылды.
Талдау көрсеткендей, сегіз айда учаскелік инспекторлар қоғамдық орындарда алкогольдік ішімдік ішкен үш мыңнан астам азаматты жазалаған. Қоғамдық орындарда темекі шегетін 159 адам жазаланды. Сондай-ақ 241 азамат ұсақ бұзақылық жасаған.
Полиция қызметкерлері қала тұрғындары мен қонақтарын қылмыс пен тәртіпсіздікке бей-жай қарамауға шақырады. Жыл басынан бері тұрғындардың хабарламасы бойынша 17 313 құқық бұзушылық тіркелді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
