Маңғыстауда республикалық ақындар айтысы өтеді

Маңғыстауда 9 тамыз күні өңірдіғ 50 жылдығы мен Ақтау қаласының 60 жылдығына орай «Маңғыстау - киелі түбегім, Ақтау - менің жүрегім» атты республикалық ақындар айтысы өтеді. Бұл туралы Қоғамдық коммуникация орталығында өткен брифингте қалалық мәдениет және спорт бөлімінің басшысы Амантай Кумбаев мәлімдеді, - деп хабарлайды mangystaumedia.kz сайты.

Оның айтуынша, шараның басты мақсаты - айтыс өнерін насихаттап, оның дамуына қолдау көрсету.

- Аталған өнер түрі республикалық деңгейде өтеді. Айтыстың өту тәртібі ережемен бекітілді. Қазіргі таңда айтыс додасына елдің әр өңірінен 14 өнерпаз қатысады. Оның ішінде есімдері елімізге танымал айтыскерлер, сондай-ақ жас ақындар да бар. Басты ерекшелік - оған түсетін сайыскерлер жеребе арқылы таңдалып, қарсыласының кім екенін сол сәтте біледі. Ал бас жүлде алған үздік айтыскер 2 миллион теңге көлемінде сыйақыға ие болады, - деді Амантай Кумбаев.

Сондай-ақ брифинг барысында Абай атындағы мәдени-демалыс кешені директорының орынбасары Маргарита Омарова қала күніне орай айтыстан бөлек бірнеше шара ұйымдастырылатынын айтып өтті.

-Аудан, қала күндерінің бағдарламасында мәдени-көпшілік шаралар, қайырымдылық акциялары, спорттық ойындар, ауылшаруашылық өнімдерінің жәрмеңкелері, жергілікті өнерпаздардың концерті жоспарланды. Шаралар 11-27 тамыз аралығында теңіз жағалауындағы амфитеатрда жұма, сенбі, жексенбі күндері ұйымдастырылады. Осы тамыз айынан бастап мерейлі мерекелік шаралардың легі көбейе түспек, - деді Маргарита Омарова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.