Маңғыстау облысында автогаз тапшылығы сезіле бастады. Жүргізушілер 2-3 күннен бері газ құю бекеттерінде кезек көбейгенін айтып отыр, деп хабарлайды mangystaumedia.kz.
Кейбір азаматтар шалғай ауылдарда газдың тіпті жоқ екенін айтады. Ал Ақтау мен Мұнайлы ауданында көгілдір отын барлық бекеттен табыла бермейді дейді. Сондықтан күндіз-түні кем дегенде жарты сағат кезекке тұратынын айтады. Күндіз көлігіне көгілдір отын құйып үлгермегендер түнде де кезекке тұруға мәжбүр. Тіпті кейбір бекеттер мүлде жабық тұр дейді көлік иелері.
5-6 жерге бардым кезек көп. 20-30 машинаның арасында бір жарым сағат, 2 сағат тұрасың. Сайөтесте газ мүлде жоқ. Ал Бейнеуде 10 күннен бері газ жоқ, - дейді кезекте тұрған жүргізушілердің бірі.
Жүргізушілер жағдай осылай жалғаса берсе баға көтерілуі мүмкін деп топшылап отыр. Десе де біраз уақыт көгілдір отыннан таршылық көрмеген азаматтар бағаның тұрақты екенін айтады. Ал әкімдік болса облыс тұрғындарының сұранысын толықтай қамтамасыз етіп отырмыз дейді. Қазір туристік маусым басталғандықтан көлік қозғалысы көбейіп, сұраныс артты деп отыр.
- 30.05.2023 жылы орын алған жағдай жаз мезгілі қарсаңында іргелес өңірлерден автокөліктердің көп келуінен және осыған орай сұйытылған мұнай газының тұтыну көлемінің ұлғайюынан пайда болып отыр. Қазіргі таңда жағдайды тұрақтандыру мақсатында жергілікті атқарушы органдар тарыпынан тиісті жұмыстар атқарылуда, - деді Маңғыстау облыстық энергетика басқармасы бөлімінің бас маманы Жасұлан Бекболат.
Энергетика басқармасының мәліметінше бір айда өңірге 17 мың тонна сұйытылған мұнай газы қажет. Ал бұл қажеттілік толықтай қамтамасыз етіліп тұр. Ал енді көгілдір отын қорын туристік маусым кезінде бекеттерге дұрыс үлестіру бойынша жұмыс атқарылып жатқанын айтады.
Махаббат Нұржанқызы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
