Ақтауда жаппай жүгіру марафоны өтті

Ақтауда Маңғыстау облысының 50 жылдығына және спорт күніне орай арнайы іс-шаралар өтті. Соның бірі – жаппай жүгіру марафонына 300-ге жуық адам қатысты, деп хабарлайды mangystaumedia.kz сайты Қоғамдық коммуникация орталығына сілтеме жасап.

Маңғыстау облысының дене шынықтыру және спорт басқармасы басшысы Қанат Жұмабаев қатысушылармен бірге марафонда жүгіріп өтті. Ол аталған іс-шара өскелең ұрпақтың пен тұрғындардың спорттық әлеуетін арттыруды көздейтінін айтты.

- Бүгінгі таңда мерекеге орай 30 іс-шараны өткізу жоспарланған. Ал бүгінгі іс-шарада әуесқой спортшылар 2 шақырымды жүгіріп өтті. Марафонға жас ерекшелігіне қарамастан кез келген адам қатысуға мүмкіндік алды, -деді Қанат Жұмабаев.

Жүгіру марафонында спорт мекеме басшылары да ерекше белсенділік танытты. Іс-шарада Дмитрий Славнов пен Александр Кабаргин әділ қазылық етті.

Марафонға қатысушылар өңіріміздің әр аймағынан жиналды. Олардың ішінде Мұнайлы, Түпқараған, Қарақия сынды аудандардан қызығушылық білдіргендер көп болған.

Іс-шара соңында балалар арасынан және ерлер мен әйелдер арасында жеңімпаздар бөлек анықталды. Ерлер арасында І орынды Бауыржан Реймбаев, ІІ орынды Бейбітбек Жанабилұлы, ІІІ орынды Ашым Оразалы және Жандос Шумабаев иеленді. Әйелдер арасында І орынды Алина Шабарова , ІІ орынды Алина Придачкина, ІІІ орынды Ұлдана Ходжаназарова және Дария Маркова иеленді. Жеңімпаздар арнайы сертификаттар, медаль және бас жүлдеге кубок табысталды.

- Бұл іс-шараға қатысудың өзі мен үшін үлкен жеңіс. Өзім жеңіл атлетика, жүгірумен айналысамын. Оның алдында жарыстарда белсенділік көрсететінмін. Маңғыстау облысындағы «Бес шоқы» спорт кешенінде жаттықтырушымын. Қазіргі таңда, қырқүйек айында өтетін Қазақстан чемпионатына қызу дайындық үстіндемін. Осы секілді іс-шаралар жиі ұйымдастырылса тұрғындарымыздың спортқа қызығушылығын оятуымыз әбден мүмкін,- деді Бауыржан Реймбаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.