Ақтауда оралдық «Дала дидары» көшпелі өнер ұжымының шығармашылық кеші өтті

Қазақтың ұлы ақыны Қадыр Мырза Әлінің шығармашылығын еліміздің әр қиырына аяқтай барып, насихаттап жүрген «Дала дидары» көшпелі өнер ұжымы Маңғыстау облысына табан тіреді, деп хабарлайды mangystaumedia.kz.

Шара барысында жоба жетекшісі Бауыржан Халиолла Батыс Қазақстанның әкімі болып тұрған тұсында Қадыр орталығының қадасы қағылғаннан шатыры жабылғанға дейін қадағалап, басы-қасында болған Нұрлан Ноғаевтың еңбегін ерекшелеп айтты. Сондай-ақ, түбекте жатып түгел қазақты мойындатқан шайыр Рахат Қосбармақов пен сатирик, ақын Ерекен Қорабаевты даланың даңқты тұлғасы «Сырым батыр Датұлы» төсбелгісімен марапаттады.

Ақтаулықтардың алдына ақынның мұрасын ақтарып салған есімдері ел аузында жүрген Қайрат Кәкімов, Жаңылсын Хасанова, Дастан Есентеміров, Альберт Ғазезжанов, Ернар Өмірәлі, Ерлан Қуанышев, Әділ Ахметов, «BatysStar» тобы жанды дауыста жоғары деңгейде өнер көрсетті. Кешті жүргізген белгілі жазушы, журналист Бауыржан Ғұбайдуллин Қадыр ақынның афоризмдері, қалжың әңгімелерімен-ақ көрерменнің жүзіне күлкі ұялатып, көңілдерін көтере білді.
Шараға облыс әкімі Нұрлан Ноғаев, БҚО Қадыр Мырза Әлі атындағы мәдениет және өнер орталығының басшысы Бауыржан Халиолла, өңірдегі әдебиет саласының майталмандары мен зиялы қауым өкілдері және қала тұрғындары қатысты.

- Өлеңдері қазақтың ұлттық қазынасына айналған Қадыр Мырза Әлі балаларға арналған әдебиет пен шығармашылықтың дамуына зор үлес қосты. Мен мұндай адамдардың ешуақытта ұмытылмай, есімдері әрдайым есте болатынына сенімдімін. Ол қазақ тілінде жазса да, оның шығармашылығымен көптеген елдерде таныс, өйткені оның жыр жинақтары орыс, неміс, литва, эстон, қырғыз, татар және басқа тілдерге аударылған. Ол 50 - ге жуық поэтикалық жинақ пен 200-ге жуық өлең жазды, әсіресе балалар шығармашылығын дамытуда үлкен жұмыс атқарды, - деді өңір басшысы Нұрлан Ноғаев.

Шарада ҚР Мәдениет саласының үздігі, «Құрмет» орденінің иегері Қайрат Кәкімов, Қазақстанның еңбек сіңірген қайраткері Жаңылсын Хасанова, «Ерен еңбегі үшін» медалінің иегерлері Дастан Есентеміров пен Ернар Өмірәлі бастаған таланттар өнер көрсетті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.