Ақтау тұрғындары жарық пен судың қымбат төлеміне жаппай шағымдануда

Қала тұрғындары жаңа жылдан бастап электр және ауыз су төлемдері екі есе өскенін айтуда, деп хабарлайды mangystaumedia.kz

Бұл туралы ақтаулықтар Маңғыстау облысы әкімдігінің Telegram-чатында жазды.

- Бір пәтерде 2 адам тұрамыз. Бір айда олар 40 текше ауыз су ішуі мүмкін бе? Бұл не? Қайдан шығып отыр? Егер сіз бассейнді үйде орнатпасаңыз немесе оны бірнеше күн бойы суды ағызсаңыз ғана ғана осыншалықты суды тұтынуыңыз мүмкін. МАЭК біз есептегіштерді алып, тексеру жүргізуіміз керек деп отыр. Біздің есептегіш жұмыс істеп тұр, пломбасы орнында болса да осылай дейді, - деп шағымданды 12 шағын аудан тұрғыны.

- Мен 2 шағын аудандағы 30 үйде тұрамын. Ай сайын электр энергиясын үнемі төлеймін, сондай-ақ көрсеткіштерді жіберіп отырамын, Егер бұрын ең көп дегенде 3500-ден 4500 теңгеге дейін жетсе, қазір ол көрсеткіш 8 438 теңгені құрап отыр. Электр энергиясының тарифі екі есеге өсті, неліктен бұлай болғанын білгім келеді. Аладйа телефон шалсақ, ешкім жауап бермейді, - деп жазды Ақтау тұрғыны.

- Мен МАЭК-тің кеңсесіне барып, бұл соманың неліктен өскенін білдім. Бұл туралы еш жерде айтылмаса да. Олар маған есептегішімді алып тастап, оны тексеруге әкелуімді өтінді. Бірақ бәрі кенеттен есептегіштерді сындыра алмайды. Өйткені, мұндай жағдай менде ғана емес, - деп жазады Ақтаудың тағы бір тұрғыны.
Осыдан кейін "МАЭК" ЖШС баспасөз қызметі қала тұрғындарының шағымдарына түсініктеме берді.
- ҚР "Табиғи монополиялар туралы" Заңына сәйкес тариф бес және одан да көп жыл мерзімге белгіленеді. Жылу энергиясын, ауыз суды, техникалық және ыстық суды өндіруге арналған тарифтер ҚР Ұлттық экономика министрлігі Табиғи монополияларды реттеу комитетінің Маңғыстау облысы бойынша департаментінің 2021-2024 жылдарға арналған бұйрығымен бекітілген. Бұл туралы хабарлама 30.11.2021 Ж. облыстық "Маңғыстау" және "Огни Маңғыстау" газеттерінде жарияланды. 2022 жылғы қарашада "соңғы тұтынушыға дейін 2022-2024 жылдарға арналған жылу энергиясын, ауыз суды, техникалық және ыстық суды өндіру мен жеткізуге арналған тарифтерді бекіту туралы" бұйрыққа өзгерістер енгізілді. Бұл ақпарат "Лада" сайтында жарияланды (https://www.lada.kz/pr/106634-ttynushylar-nazaryna-k-svedeniyu-potrebiteley.html). Бүгінгі күні тарифтер бекітілген бұйрыққа сәйкес қолданылады. Тарифтер кестесі сайттарда орналастырылған (www.maek.kz және rkc.maek.kz). "МАЭК" ЖШС бұқаралық тыңдаулар өткізу туралы БАҚ арқылы хабарлайды, - деп жазылған мекеме таратқан хабарламада.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.