Дәрігерлер сирек кездесетін ауруға шалдыққан маңғыстаулық баланың жағдайы туралы айтты

Маңғыстауда сирек кездесетін «СМА» ауруына шалдыққан бүлдіршіннің жағдайы жақсарып келеді, деп хабарлайды mangystaumedia.kz облыстық денсаулық сақтау басқаомасының баспасөз қызметіне сілтеме жасап.

Маңғыстау облыстық көпбейінді балалар ауруханасының невропатолог дәрігері Мария Алдабергенованың құны 38 миллион теңге тұратын генетикалық препарат рет-ретімен жұлынға енгізіліп жатқанын мәлімдеді. Медициналық көрсеткіш бойынша науқастың қимыл-қозғалыс деңгейі нәтижелі болып отыр.
- СМА ауруына шалдыққан қыз балаға «Спинраза» атты гендік препаратты 3 рет жұлынға енгіздік. Бірінші инекциясы 21 желтоқсан күні салынды. 4 қаңтарда екінші, 18 қаңтар күні үшінші инекциясы салынды. Енді 20 ақпанда төртіншісі салынатын болады. Бала ең алғаш келген кезде анасының көмегі арқылы отыратын еді. Бірінші препаратты салғаннан соң өздігінен отыра алатын болды. Қазір ол арқасын түзу ұстайды. Қолына қалам ұстап жазады, сурет те салады. Оның ұсақ моторикасы дамып келе жатыр. Яғни, өзгеріс бар, - дейді дәрігер Мария Алдабергенова.

Емдік препаратты алу үшін Маңғыстау облыстық денсаулық сақтау басқармасы республикалық бюджеттен қаржы қарастырған.

- Жалпы бұл тұқымқуалаушылық генетикалық ауру. Жұлынның алдыңғы жағында орналасқан қозғалыс нейрондарының болмауынан туындайды. Бұл кезде науқастың қимыл-қозғалысқа ешқандай әрекеті болмайды. Мұндай балалар отыра алмады. Жүре алмауынан бөлек, қимыл қозғалысы болмайды. Оларды тексеріп, зерттеп, тұрғылықты жері бойынша медико-генетикалық анализ алып, республикалық «Ана мен бала» орталығына жібереміз, - деді Мария Алдабергенова.

Бүгінде облыс бойынша аталған сырқат түріне 4 бала шалдыққаны белгілі болып отыр. Олар әрдайым ата-ананың және дәрігердің бақылауында.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.