Аймақта экологиялық қоғамдық бірлестік құрылуы мүмкін

Бүгін, 19 ақпан күні Маңғыстау облысы экология департаментінің басшысы Руслан Төкенов кездесу өткізді. Жиын барысында еріктілерден құралған экологиялық қоғамдық бірлестік ашу жобасы ұсынылды, - деп хабарлайды mangystaumedia.kz сайты.

Кездесуге Маңғыстау облысы бойынша эко-амбассадор Әділбек Қозыбақов, Маңғыстау облыстық «Адалдық алаңы» филиалының басшысы Әсет Манов, Маңғыстау ТЖ саласының ардагері Қажымұрат Хайрушев, экология департаментінің мамандары, қоғам белсенділері және БАҚ өкілдері қатысты.

Алдымен облыстық экология департаментінің басшысы Руслан Төкенов сөз алып, облыстағы экологиялық мәселелерге тоқталып, оны шешу жолында жұмыстар жүргізіліп жатқандығына тоқталды. Сонымен қатар қоғамдағы өзекті проблемаларды бірігіп шешу керек екендігін айтты.

Ал Әділбек Қозыбақов «Еріктілер жылы» аясында экологиялық қоғамдық бірлестік құру жөнінде ұсыныс білдірді. Бірлестік арқылы жастармен жұмыс істеп, аймақтағы табиғат тазалығының сақталуына, қоқыстан арылуына және теңіздің қорғалуына атсалысады.

«Аймақтағы ЖОО орындарында болашақ эколог мамандарды оқытып, білім беріп жатыр. Олар аз уақыттың ішінде маман атанып, қолға диплом алады. Жұмысқа орналасу үшін жұмыс тәжірибесі сұралады. Ал оқу орнын енді бітірген жаста қандай тәжірибе болуы мүмкін? Сондықтан жастармен бірігіп жұмыс істеу және оларды қоғамдық мәселелерде белсенді болуға шақыруымыз керек. Сол себепті де ерікті жастардан құралған бірлестікті құру тиімді болмақ», - деді эко-амбассадор Ә.Қозыбақов.

Сонымен қатар кездесуде экологиялық мәдениетті қалыптастыру бойынша үгіт-насихаттық жұмыстардың жүйелі жүргізілуіне назар аудару қажеттілігі де айтылды.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.