Бүгін, 15 ақпан күні Ақтауда Маңғыстау облысы әкімінің орынбасары Қаныбек Жұмашевтың, Ауған соғысының ардагерлері мен мектеп оқушаларының қатысуымен Ауған соғысының құрбандарын еске алу рәсімі өтті, - деп хабарлайды mangystaumedia.kz сайты.
Айта кетейік, биыл Кеңес әскерінің Ауғанстан жерінен шығарылғанына 31 жыл толды.
- Бұл соғыстан зардап шеккен көп. Соның ішінде біздің елдің азаматтары да бар. Сол соғыс құрбандарына құрмет көрсету – біздің қасиетті парызымыз. Майданда мерт болған жауынгерлер есімі ел жадында мәңгі сақталмақ - деді Қаныбек Жұмашев.
Жиналған қауым соғыста қаза тапқандардың аруағына тағзым қылып, оларға арналған ескерткішке гүл шоқтарын қойды.
- Ауған соғысына 22 мыңнан астам қазақстандық жауынгеріміз аттанды. Оның 761-і мерт болса, ал 21-і хабар-ошарсыз жоғалып кетті. Бұл күн біз үшін тек қана мейрам емес, сонымен қатар қаралы күн, қаза тапқан бауырларымызды еске алатын күн, - дейді Маңғыстау облыстық әскери ардагерлер кеңесінің төрағасы, полковник Нұрлыбай Қонақбаев.
Кездесу Құрық ауылында жалғасын тауып, майданда қаза тапқан сегіз маңғыстаулықтың бірі, “Қызыл жұлдыз” орденінің иегері Сәлімжан Әлиев бюстінің ашылу салтанаты өтті.
Сәлімжан Жақуұлы 1968 жылы 23 сәуірде дүниеге келген. Балалық шағын Құрық ауылында өткізіп, Түрікменстанның Ашбахад қаласына әскерге шақырылған. 1986 жылы соғысқа аттанып, 1988 жылы 31 қаңтарда кезекті бір ұрыста мерт болған.
- Үйде он баламыз. Сәлімжан алтыншы бала, төртінші ұл еді. Қазақ күресімен айналысатын, бірнеше сайыстарда жеңімпаз атанып жүрді. Әр жылдың 23 сәуірінде ініме арналған қазақша күрестен республикалық турнир өтеді. Турнир бұл жылы да өтеді. Сәлімжан тек қана менің інім емес, халықтың да баласы. Оған осындай құрмет көрсетіп жатырған еліме алғысым шексіз, - дейді С.Әлиевтің әпкесі Ғалия Әлиева.
Арай ЖАУПЕРОВА
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
