Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Ақтау қаласындағы Назарбаев Зияткерлік мектебінің 12-сынып оқушылары Сағынбек Талғатұлы мен Айя Сартбаева Абу-Даби қаласындағы New York University (NYUAD) жоғары оқу орнының білім грантын иеленді, - деп хабарлайды mangystaumedia.kz сайты мектептің баспасөз қызметіне сілтеме жасап.
Айя – білім ордасының үздік, белсенді оқушыларының бірі. Ол білім ордасында тілдік қабілеттерін шыңдап қана қоймай «Телестудия» үйірмесіне белсенді қатысты. Сонымен қатар, түрлі жарыстарда, пікірталас клубтарына мүшелікке ие. Соңғы жылы зияткер БҰҰ Моделі клубында белсенділік танытты. Грант иегерінің сөзінше, оның мектеп өміріне, шараларға, үйірмелерге белсенді қатысуы университетке түсуге арналған сұхбат барысында үлкен көмек көрсеткен.
«Университет туралы қазан айында әлеуметтік желілерден білдім. Кейін қажетті құжаттар тізімімен танысып, кәсіби бағдар беру кеңесшісінің көмегімен жинақтадық. Өткен аптада бізді Абу-Дабиге сұхбатқа шақырды. Сол жерде 75 минутқа созылған тақырыптық эссе жазып, профессорлармен сұхбаттасып, университетпен таныстық. Қаланы көруге де мүмкіндік болды. Ал бүгін жауабын мектепке шақыру қағазы арқылы жіберді. Қуанышымда шек жоқ», - дейді Айя Сартбаева.
Сағынбек Талғатұлы – зияткерлік мектептің бетке ұстар оқушыларының бірі. Физика, математика пәнінен бірнеше халықаралық олимпиадалардың жеңімпазы. Сондай-ақ робототехника мен ғылыми жобалар байқауында да бой көрсетіп жүлделі орындардан көрініп жүр.
Абу-Дабидегі Нью-Йорк университеті – АҚШ- тағы Нью-Йорк зерттеу университетінің бөлімі. 2010 жылы алғаш студенттерін қабылдаған университет бүгінде инженерия, гуманитария-жаратылыстану бағытындағы мамандарды даярлайды. Университетке үміткерлерден талабы өте жоғары. Статистикалық деректерге сүйенсек, жыл сайын аталған оқу орнына 144 мыңнан аса өтінім келіп түседі. Оның 4 пайызы ғана оқуға қабылданады екен.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.