Ақтаудан 20 шақырым жерде «AKTAU RESORT HOTEL» көпфункционалды туристік қонақ үй кешені ашылады, - деп хабарлайды mangystaumedia.kz сайты.
Көпфункционалды туристік қонақ үй кешенінің құрылысы 2019 жылдың маусым айында басталған еді. Қазіргі таңда құрылыс жұмыстарының 30% аяқталды. Құрылыс басында 750 адам жұмыс істеп жүр. Жоспар бойынша туристік нысанның 1-кезеңі 2020 жылдың маусым айында аяқталады.
Облыс әкімінің айтуынша, қонақ үй кешенінің жалпы аумағы – 130 гектар. Онда наурыздан бастап қазан айына дейін Каспийдің мөлдір суына түсіп, құмына қыздырынуға болады. Аквапарк пен ашық бассейндер арнайы құрылғының көмегімен жылынбақ. Курорттық орталық іске қосылған соң 750 адам тұрақты жұмыспен қамтылады.
Жобаны іске асырушылар туристік кешенде жұмыс істейтін мамандарды даярлау ісіне орай облыс әкімдігімен келісім жасады. Былтыр желтоқсанда Маңғыстау туризм колледжі базасында қонақ үй бизнесі және мейрамхана ісі мамандықтары бойынша «Rixos Aktau Training Aсademy» бағдарламасымен ақысыз негізде қысқа мерзімде кадрларды оқыту басталған болатын. 400 маман 1 айлық курстан өтіп, сертификаттарға ие болды. Бүгінде кадрларды даярлау жұмыстары жалғасуда. 2020 жылдың мамыр айына дейін 1200-ден астам адамды оқыту жоспарда бар.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
