Бүгін «Кәсіби бағдар» жобасы аясында №1 орта мектебі және №11 мамандандырылған физика-математикалық мектебінің оқушылары Қазақстан Республикасы Ұлттық қауіпсіздік комитеті Шекара қызметі 2018 әскери бөліміне барды. Далалық оқу жиынында оқушылар қару-жарақ түрлері мен әскери техникалар, иттерді оқытуды ұйымдастыру, әскери қызметкерлердің қолмен ұрыс жүргізу дағдыларымен танысты.
Оқушылардың далалық-оқыту жиынын басқарған 2018 әскери бөлімінің Десанттық шабуылдау мотомоневрлік тобының бастығы майор Орақов Нұрбек Рахымбекұлы: «Бұл жиынды өткізудегі мақсатымыз - болашақ сарбаздарды әскери өмірге дайындау, оларға патриоттық тәрбие беру. Оқушылар мұнда техникалық, атыс, саптық дайындықтармен қатар әскери қызмет негіздері бойынша тәжірибе жинайды. Олардың арасында болашақта әскери училищеге, институтқа түсемін дегендер де бар. Сондықтан да, оларға әскери тәртіп пен құрмет көрсету әдістерін үйреттік, әрқайсысымен жеке жұмыс жасауға тырыстық», деді.
Жиын барысында оқушыларға арналған спорттық-әскерилендірілген эстафета өтті. Жастарды әскери-патриоттық бағытта тәрбиелеудің күшейтілуін көздеген далалық-әскери оқуларға атсалысқан оқушылардың дайындығы бұл уақыт ішінде жоғары деңгейде қалыптасқанын өз көзімізбен көрдік. Командалар саптық сайыста, спорттың әскери-қолданбалы түрлерінен күш сынасты. Жалпы командалық көрсеткіш бойынша №1 мектеп бірінші орынды, №11 мамандандырылған физика-математикалық мектебі екінші орынды иеленіп, алғыс хаттармен марапатталды.
Бір күндік әскери-далалық жиында оқушылар алғашқы әскери дайындық пәнінен меңгерген дағдыларын тәжірибелік түрде пысықтады.
Шараның жас ұрпақтың өз Отанына, туған жеріне деген сүйіспеншілігін арттыра отырып, болашақ Отан қорғаушылардың патриоттық сезімін қалыптастыруда мәні зор.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
