Дүйсембі Әріпұлының қос кітабының тұсауы кесілді

Қаламгер Д.Әріпұлының 85 жасында қос кітабының тұсауы кесілді

Ақтау қаласында Маңғыстау журналистерінің көшбасшысы, еңбек ардагері, қоғам қайраткері, ел ақсақалы Дүйсембі Әріповтің 85 жасымен орайластырылған «Өмір жолы» және «Халық даналығы» кітаптарының тұсаукесері өтті. Мерейтойға облыс басшысы Ералы Тоғжанов, ҚР Ақпарат және коммуникациялар министрі Дәурен Абаев, ардагерлер мен зиялы қауым өкілдері, ағайын-туыстары, балалары қатысты.

Зейнетке шыққалы ел ше­жіресі, замандастары тура­лы толымды еңбектер жазуды қолға алған ақсақалдың мерейтойы Маңғыстау облысының әкімі Ералы Тоғжановтың құт­тықтау сөзімен ашылды.

- Тұсаукесерді Дүйсекеңнің ту­ған күніне дүйсенбі күніне белгі­леп өткізіп отырмыз. Кітабын да­йындап жатыр дегесін кітабын күтейік дедік. Дүйсембі аға, той құтты болсын! Сіздер сияқты сү­йегі асыл, жастарға үлгі азаматтар бар кезде еліміздің рухы да, намы­сы да, болашағы да биік болады деп айтуға ешқандай күмән жоқ қой деп ойлаймын. Қадірлі ағайын, бүгін ортамызға ақпарат министрі Дәурен Әскербекұлы арнайы келіп қатысып отыр, – деп астаналық қонаққа сөз берді.

Құттықтау сөз кезегін алған ҚР Ақпарат және коммуникациялар министрі Дәурен Абаев:

- Қадірлі қауым, қадірменді Дүй­сембі аға! Сізді елге танымал журналист ретінде жақсы білеміз, қатты құр­меттейміз, сыйлаймыз. Бүгін екі кітаптың тұсаукесеріне қатысып отырмыз. Болашақ ұрпақ тәрбие­сіне өз үлесін қосады деп сенеміз. Денсаулығыңыз мықты болсын! Тұсаукесерлер жалғасты болсын! Құрметті маңғыстаулықтар! Бү­гін Қазақстанда пилоттық жоба ретінде тұңғыш рет цифрлық теле­виденияның тұсауы кесілді. Енді Маңғыстау облысы бірінші болып цифрлық телерадио хабарын облыс орталығында – 30, шалғай ауыл­дарда 15 отандық телеарнаны өте жоғары сапада тегін көре алады, – деді.

Тұсаукесер рәсімін жасау үшін ортаға республикалық ардагерлер кеңесі төрағасының орынбасары, қоғам қайраткері Өмірзақ Озған­баев, қоғам қайраткері Зейнолла Алшымбаев, Қазақстан Жазушы­лар одағының мүшесі, ақын Ай­туар Өтегенов шығып, құттықтау сөз сөйледі.

Өмірзақ Озғанбаев: - Құрметті ағайындар! Асыл аға, абзал аға, Дүйсеке! 85 жасыңыз­ды халқыңыз жиналып, Ералы Лұқпанұлы бас болып, өзіңізді құттықтауға келіп тұр. Сіз бізге абзал аға, көп азаматтарға ұстаз болдыңыз. Көп мұраларды халық­қа қалдырдыңыз. Санамалап айтар болсам, «Маңғыстау» энциклопе­диясына сіздің сіңірген еңбегіңіз – Әбіш ағамен бірге ұрпақтың есінде қалатын, ұмытылмайтын шаруа.

Бейнеу ауданын басқарған жыл­дардағы халық үшін атқарған ең­бегіңіз – өмір жолыңыздағы үлкен белес. Ержан хазіреттің артына қалдырған мұраларын ұзақ уақыт жинап, зерттеп, халықтың жадына сіңіруге бірнеше жылдан бері ең­бек етіп келе жатырсыз. Қазығұрт тауына барып, қасиетті Мұңал ошақты іздедіңіз.

Сіз – Маңғыстау тарихының жылнамашысыз. Өлке тарихының көп беттерінің анығын ашқан, осы өлкедегі Адай көтерілісі туралы жинақты шығаруға қаншама еңбек еттіңіз. Өмір бойы оқумен, тоқумен келе жатырсыз. Соның арқасында сіздің қаламыңыздан тағылымы мол еңбектер туындады, қаншама кітаптар шықты.

Сіздің кітап оқу әдісіңіз, сти­ліңіз, әр бетті сызып, оны бөлек қағазға жазып алып, оқуыңыз – таңқаларлық іс. Маңғыстау мектеп­теріндегі оқушыларды сіздің кі­тап оқу стиліңізді үйрету арқылы насихаттасақ деп ұсыныс жаса­ғанмын. Бұл бағытта талай жұ­мыстар жасалды. Елдің бірлігін, болашағын ойладыңыз.

Дүйсеке, жүз деп аталатын биікке қарата тарта беріңіз!

Халқымыздың ғасырлар бойы жинаған асыл мұралары жинақ­талған екен. Бұны аға айтпаса, бү­гінгі компьютердің алдында отыр­ған бала қайдан біледі? Біз сіздің алдыңызда бас иеміз. Әрдайым алдымызда Дүйсекең болсын! От­басыңызбен бірге аман болыңыз, өмір жалғаса берсін! – деп бітірді сөзін Өмекең.

Бұдан соң облыс әкімі атынан той иесі Дүйсембі ағамызға қал шапан жабылды.

Құттықтау кезегін алған Зейнолла Алшымбаев: – Құрметті жиналған қауым! «Қызыл барқыт кітаптың берері мол» деп мақала жазып, ол облыстық газетке басылып шық­қан. Осы өлкенің тарихын біз осын­дай ақсақалдардың  жазбалары­нан білеміз. Осы кітапта көптеген естеліктер бар. «Өмір жолы» – ме­муарлық жанрда жазылған та­ғылымы мол кітап. Жасыңыз ұзақ болғай. Айығып кетіңіз! – деді.

Өз кезегінде ақын Айтуар Өте­генов: - Мені Маңғыстауға алып кел­ген сіз едіңіз. Алып келіп қоймай, Маңғыстау шежіресін зерттеуге, творчествома шалқар шабыт бер­генсіз. Дүйсеке, сізге денсаулық тілеймін, – деп мерейтой иесіне арнаған өлеңін оқыды. Ақынның:  «Маңғыстаудың маң даласы секіл­ді, Ұғынғанға өн бойыңыз пара­сат... Кейде ұрсар, кейде сипар маңдайдан, Керек бізге өзіңіздей жақсы аға» деген сөздері қатысқан көпшіліктің көкейіндегі ойды дөп басқандай болды.

Мерейтой иесін құттықтау тілек одан әрі жалғасын тауып, ардагер ақсақал Тергеу Айдарханов «Дүй­сембі аға 85 жаста» өлеңін оқып, «Жүре бер ортамызда кітап жазып, Толысқан айы болып осы ел­дің!» – деп бітірді өз құттықтауын.

Еңбек ардагері, ардагер ұстаз Қойлыбай Қаражанов мерейтой иесінің өзіне туыстық жағынан аға болып келетінін айтып, оның елге сіңірген еңбегіне қысқаша тоқтала келе, шараны ұйымдастырған об­лыс, қала әкімдігіне алғыс тілегін білдірді.

- Дүйсекең идеология жұмыста­рының басшысы болды. Принцип­шіл, талапшыл, азаматты тани білетін, сол ісіне қарай бағалай бі­летін аға, – деп аяқтады Қойлекең құттықтау сөзін.

Одан соң тілек айтқан ардагер ақсақал Бектұр Төлеуғалиев: - Құрметті Дүйсеке, 85 жасыңыз құтты болсын! Қамшы сабындай қысқа өмірде әр адамның артында жол қалады. Кейбірінің артында бұралаң, кейбірінің артында сара жол қалады дейді. Сіздің артыңыз­ да үлкен сара жол қалып отыр. Тұщықұдық  өңірінен көпте­ген азаматтар шықты. Сол Тұщы­құдықтан шыққан азаматтың бірі өзіңіз. Ауыл шаруашылығын, қо­ғамды, әдебиетті дамытуға үлес қосып жүрген азаматсыз. Дүйсе­кең сияқты ағаларыңызды сыйлап, құрметтеп, мынадай үлкен мереке жасап, халықтың алдында құрмет көрсеткеніңіз үшін халық атынан рақмет айтам, – деп қала, облыс әкімдігіне алғыс айтты.

Құттықтау кезегіне ие болған ұзақ жылдар облыстың басқару орындарында қызмет  еткен Ға­ни Карин Дүйсекеңнің жақсы қа­сиеттерін айта келе, онымен біраз жылдар жұмыстас болғанын, ақ­ сақалдың өзінен жасы кіші адам­дарға сіз деп сөйлейтін кішіпейіл­дігін ерекше атап өтті.

Аудан, облыс басшылы­ғында қызмет атқарған ардагер Сақып Керелбаев Дүйсекеңмен қызметтес болған кезінде оның кітапқа құмарлығын, ұқыптылығының күштілігін айта келіп, ақсақалға жинағын музейге тапсыруға ұсыныс жасады.

Одан соң Дүйсембі Әріповтің туған апасы Марқаш інісін сый­лап, тойға келген ел азаматтарына алғыс білдіріп: - «Ел ағасыз, тон жағасыз бол­майды» дейді, қарағым 85 жасың құтты болғай! Халқыңа қалаулы, еліңе елеулі болдың. Аманшылық болсын! – деген тілек айтты.

Той иесінің інісі, «Маңғыстау» газетінің бас редакторы, ақын Ға­лым Әріп: - Біздің тойымыз дей алмаймыз. Себебі Дүйсекең – тек біздің ағамыз емес, елдің азаматы, ел ағасы, – деп тойды өткізіп отырған облыс, қа­ла әкімдігіне тумаластары атынан алғыс айтты.

Тойдың жөн-­жоралғысы, қонақ сыйлаған халық ретінде құрметті қонақтар Ералы Тоғжанов пен Дәурен Абаевтың иығына ата сал­тымен шапан жапты.

Мерейтой барысында Бейнеу ауданынан арнайы келіп, мерекеге қатысқан еңбек ардагері Сұлтан Жаңбыров, аудан әкімінің орын­басары Үміт Әмірханова аудан жұртшылығы атынан той иесін құттықтап, иығына шапан жауып, ат мінгізді.

Жоламан Бошалақ Дүйсекеңнің Маңғыстаудан бірінші Журналис­тер одағының мүшелігіне өткен қаламгер екенін, Әбіш Кекілбаев секілді кемеңгерге сабақ бергені­ мен, «Әбіштің ұстазы – Халық» деп, шәкіртінің мәртебесін әрдайым жоғары көтерумен жүретінін айт­са, кәсіби журналшы, Ақтау қала­сының құрметті азаматы Мейрам­бай Қибасов: «Халыққа ең жақын жүрген әкім ретінде Маңғыстау тарихында Ералы Лұқпанұлының аты үлкен әріптермен жазылып қалатынына менің көзім жетеді» - деп, тойды ұйымдастырған облыс басшысының атына мақтау айтты.

Мереке барысында облыстық фи­лармония әншілері өнер көрсетіп, көпшілік қошеметіне бөленді.

Сонымен «Рухани жаңғыру» аясында тағы бір торқалы той, та­ғылымды тұсаукесер өтті.

Үміт ЖӘЛЕКЕ, Суреттерді түсірген Серік МАЙЕМЕРОВ

[gallery td_select_gallery_slide="slide" ids="64322,64323,64321,64324"]