Скрипкашы Айман

Сиқырлы скрипка аспабын шебер сөйлетіп, саз өнерінің шыңына шыққан Айман Муса­ ходжаеваны бүкіл қазақ, қала берді әлемнің өнерсүйер қауымы түгел мойындағанын оқырмандар жақсы біледі. Ал сол Айманмен аттас ақтаулық Айман Алданазарованың да осы бір ғажайып аспапты өз өміріне серік етіп, отыз жылдан аса уақыт жас ұрпаққа скрипканың қыр-сырын үйретіп сабақ бергенін біле де бермеуі мүмкін. Осы олқылықтың орнын аз да болса толтыра түсу ниетімен өзіміздің ақтаулық өнерпаздың өмірі мен шығармашылығынан оқырманға қысқаша мәлімет­-деректі мақаламды ұсынуды жөн көрдім. Осы орайда Айман Көркембайқызының 1981 жылдан Балалар өнер мектебінде скрипка сыныбынан сабақ бергенін «Үрмелі және шекті аспаптар» бөліміне жетекшілік еткенін жеткізе кеткеннің артықшылығы бола қоймас. Отыз жылдан аса уақыт сиқырлы аспапты ойнау және ойнау машығын жетілдіру, шеберлікті шыңдау үшін аз ба, көп пе? Жалпы өнерде, оның ішінде аспаппен жұмыс істеуде шығармашылық шеберлікті жетілдіру мерзімі шексіздікке жетелейтінін  өнерге  өмірін арнағандар аз айтқан жоқ. Өнердің қиындығы да, өнерпаз шеберлігінің жұмбақтығы да сонда жатса керек. Бұл тұрғыдан келгенде Айман Көркембайқызының да өз түйін-толғамы аз емес. Оның осынша уақыт бір ғана аспаптың қыр-сырын үйренумен және үйретумен болғаны да содан шығар. Айманның шығармашылық жолына шын берілген, шебер ұстаз екенін 2011 жылы Маңғыстау облыстық білім бөлімінің аттестациялық комиссиясының 30.09.2011 жылғы №6 бұйрығымен жоғары дәреже беруі айғақтайды. Айманның ғылым мен білімге деген ықыласы өз әкесі, экономика ғылымдарының докторы Көркембай ақсақалдан дарыған деуге негіз бар. Ұзақ жылдар бойы жас ұрпақты сиқырлы скрипка аспабын меңгерудің қыр-сырына үйрете жүріп, өзі де үйренуден бір талмаған ынталы ұстаздың 2015 жылдың сәуір айында Астана қаласының Қазақ ұлттық өнер университетінде «Тенденции современного искусства по видам» тақырыбы бойынша біліктілік арттыру курсынан өтуі, осы қалада америкалық елшілік жанында білім жетілдіру семинарына қатысуы оның өнерге деген сүйіспеншілігінің деңгейін танытса керек. Скрипкашы ұстаздың талапты шәкірттері жыл сайынғы республикалық шекті, үрмелі және соқпалы аспаптар байқау-фестивалінен жүлделі орындарға ие болып келуі де, оның аспапта орындау шеберлігінен жоғары дәрежеде сабақ беруінің бір көрсеткіші деп айтуға болады. Мысалы, 40 шақты өнер ұжымының 350 солист-сайыскері қатысқан байқаудан Айман Алданазарованың тәлімгер-оқушысы Анель Русланованың жүлделі екінші орынды жеңіп алуы үлкен жетістік десек асырып айтқандық болмас. Жартығасырлық тарихы бар өнер мектебінде отыз жылдан артық абыройлы қызмет етіп, жас ұрпақты өнер жолына бағыттап, шығармашылық жұмыс жасап келе жатқан Айман Көркембайқызына алдағы уақытта да жемісті еңбектің игілігін көруге жазсын дегіміз келеді.

Үміт ЖӘЛЕКЕ