Ақтауда психологиялық-педагогикалық түзеу кабинеті ашылды

Ақтауда «Бәріміз бірдейміз-кемсітуді білмейміз: Қазақстанда инклюзивті қоғам құру» жобасының аясында психологиялық-педагогикалық түзеу кабинеті ашылды. «Дара» қайырымдылық қоры ашқан арнайы кабинет сөйлеу, көру, есту қабілетінде, оқып-үйрену, қарым-қатынас жасау мен дамуында қандай да бір қиындықтары бар балалар мен жасөспірімдерге психологиялық-педагогикалық-медициналық көмек көрсетуді мақсат тұтады.

"Балалармен жеке даму бағдарламасына сәйкес дефектолог, логопед, тифлопедагог, стардопедагог, олигофренопедагог, психолог, әлеуметтік педагогпен жеке және топтық жұмыстар жүргізіледі", - деді «Дара» қорының өкілі Гүлнар Досаева салтанатты шарада.

Салтанатты рәсімге Маңғыстау облысының әкімі Ералы Тоғжанов қатысып, мұндай ұйымдардың қажеттілігіне баса назар аударды.

«Президентіміз Н.Ә.Назарбаев «Қазақстанның әлеуметтік жаңғыртылуы» бағдарламасында: «Менің назарымдағы басты мәселе - әр қазақстандыққа қамқорлық көрсету» деген болатын. Олай болса, бүгін «Дара» қайырымдылық қорының құрылтайшысы, қазақтың қарапайым қызы Гүлнар Досаеваның қолдауымен мүмкіндігі шектеулі балаларға арналған психологиялық-педогогикалық түзеу мекемесінің ашылуына өздеріңіз куә болып отырсыздар. Аталған мекеме бүгіннің өзінде Ақтау қаласындағы 270-ке жуық мүмкіндігі шектеулі баланың 35-ін қабылдап, өз жұмысын бастап кетті», - деді Е.Тоғжанов.

Маңғыстау облысы әкімінің баспасөз қызметінің мәліметінше, бүгінде Маңғыстауда 4968 мүмкіндігі шектеулі тәрбиеленуші тіркелген. Арнайы білім беру ұйымдарында 49 арнайы педагог, 23 логопед, 19 олигофренопедагог, 7 сурдопедагог  жұмыс жасайды.

Айта кетерлігі, 2018 жылдың соңына дейін Маңғыстау облысының білім басқармасы мүмкіндігі шектеулі балаларға арналған Мұнайлы ауданынан Педагогикалық-психологиялық-медициналық концультация, Түпқараған ауданы Ақшұқыр ауылынан Психологиялық- педагогикалық түзету кабинетін ашуды көздеп отыр.

Камшат ОҢҒАЛТАЙ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.