©
«Ұлтымыздың түп қазығы – ауылда» демекші, ауылдың күнкөріс деңгейін жақсартуға ерекше ден қойылуда. Жергілікті тұрғындардың өмір сүруіне жағдай жасап, мектеп, балабақша және емханалар бой көтеруде. Аталмыш мекемелерде сапалы жұмыс жүргізілу үшін білікті әрі жас мамандар күшін ауылға жұмылдыруда. Осы ретте Жаңаөзен қаласына іргелес орналасқан Теңге елді-мекеніндегі №2 емханасының жас маманы, «Үздік жас көшбасшы» атағын иемденген жалпы тәжірибелі дәрігер Камелжан Бимағамбетовпен сұхбаттасқан едік.
- Камелжан, қандай оқу орнының түлегісіз? Ең алғаш еңбек жолыңыз қай жылдары басталды?
- 2015 жылы Батыс Қазақстан Мемлекеттік Медициналық университетін «Жалпы тәжірибелі дәрігер» мамандығы бойынша тәмамдадым. Сол жылы жас маман ретінде менің алғаш еңбек жолым Теңге ауылының емханасында басталды. Міне, содан бері осы мекеме қабырғасында еңбек етіп жүрмін. Сонымен бірге, қазіргі таңда Жаңаөзен қалалық балалар ауруханасында да кезекші дәрігер қызметін атқарамын.
- Жалпы тәжірибелі дәрігердің негізгі атқарар қызметі қандай?
- Іңгәләған бала мен еңкейген қарияға дейін жалпы тәжірибелі дәрігердің қарауында болады. Жалпы тәжірибелі дәрігер өзіне тиесілі белгіленген аймағындағы тұрғындардың денсаулығын қадағалап, қажет кезде медициналық көмек көрсетеді. Тұрғындарды жыл сайынғы медициналық тексерістен өткізіп, уақытылы тегін екпе, дәрі қабылдауымен қамтамасыз етіп отырады. Диспансерлік есепте тұрған азаматтарға белгіленген мерзім бойынша ем жүргізіп, халықтың денсаулығын нығайтуға себепкер болады. Сонымен қатар, халық арасында медициналық сақтандыру және үгіт-насихат шараларына белсене атсалысатын мамандардың бірі.
- Қазіргі таңда Теңге ауылының тұрғындарының әл-ауқаты қай деңгейде?
- 17 мың халқы бар Теңге ауылының қазіргі таңда жағдайы жаман емес. Кез келген тіркелген науқас дәрігер бақылауына алынып, тиісті ем-домдар тағайындалуда. Қала, ауыл әкімдігі және Маңғыстау облыстық денсалық сақтау орталығының көмегімен былтыр біздің емханамызға күрделі жөндеу жұмыстары жүргізілді. Бұл емхана қызметкерлеріне жоғары деңгейде еңбек етуіне ықпал жасап, ауыл тұрғындарының дер кезінде әрі сапалы ем алуына мүмкіндік туғызып отыр.
- Ауыл тұрғындары арасында көп кездесетін ауру түрлері қандай?
- Тұрғындар арасында созылмалы ауру түрлері көптеп кезедеседі. Дәрігерлердің қабылдауына келетіндердің ішінде қарттардың саны басым. Келушілер арасында асқазан жолдары аурулары жиі тіркеледі. Үлкендерде жүрек-қан тамырлары аурулары, артериялық қан қысымының жоғарылауы мәселе болып отыр. Жүрекке жасалатын оталар да көп. Мұның себебі тұрғылықты халықтың өмір сүру салты, ас қабылдау дәстүрі дұрыс емес. Қарапайым халық той-садақа жиындарға көп барады. Тойда майлы ет асылып, күріштен дайындалған палау сияқты тамақтар беріледі. Етті мөлшерден тыс көп жегеннен ас қорыту жүйесі бұзылады. Осының салдарынан жүрекке, ұйқы безіне күш түсіп ағзалардың функциональды жұмыс жасауының төмендеуі созылмалы аурулардың көбеюіне әкеліп соқтырады. Қарияларда жиі кездесетін екінші ауру түрі – қант диабеті. Бұл ауру тек Теңге ауылында ғана емес, еліміз бойынша, тіпті әлемдік деңгейде белең алып отыр. Қант диабеті ересектермен қатар жастар арасында да жиі кездесуде.
- Емхана тарапынан ауыл халқының денсаулығын нығайту мақсатында қандай шаралар ұйымдастырылады?
- Егде жастағы адамдардың жылдарына сәйкес ерлер мен әйелдерге скрининг жүйесі арқылы тексеріс жүргіземіз. Аталмыш тексеріс арқылы адам ағзасындағы кезедесетін қауіпті аурулардың алдын аламыз. Байқалған белгілер арқылы кез келген сырқаттың бетін қайтарып, тиісті ем түрлерін уақытылы жасаймыз. Ағзаға түскелі отырған ауруға тұсау қойғанымыз адам өмірінің ұзаруына үлкен септігін тигізеді. Скрининг тексеру жұмыстары арқылы дәрігерлердің де қалыпты әрі тиімді қызмет жасауына мүмкіндік туады.
- Дәрігерлік жолды таңдауға не себепші болды?
- Бұл қиын да күрделі еңбек жолын таңдауыма ата-анам мұрындық болды. Халқына қызмет етсін деген тілектері шығар. Мен өзім Теңге ауылында туып-өстім. Ауылдың көшелері талай доп қуып, ат терлеткен жерім. Қазіргі таңда маман атанып туған ауылымның өркендеуіне аз да болса үлес қосып жатқаныма шын қуаныштымын.
- Жас азаматсыз жұмыстан бос уақытыңызда немен айналысқанды ұнатасыз? Өнерден құр алақан емес шығарсыз?
- Дәрігерлер салауатты өмір салтын үгіттеуші жандардың бірі болғандықтан, бос уақытымда спортпен шұғылданғанды ұнатамын. Мектеп қабырғасында баскетбол, футбол, күрес сияқты спорт түрлерімен айналыстым. Түрлі сайыстарда топ жарып, жүлделі орындарға ие болдым. Қазір уақыт тапшылығына байланысты, көпшілік арасында сұранысқа ие тек футбол ойнағанды ұнатамын. Сонымен қатар, өзім қызмет ететін Теңге емханасы Жаңаөзен қалалық №2 емханаға қарасты болғандықтан, аталмыш емхана намысын қорғайтын спорттық топтың көшбасшысымын. Мамандар арасында өткізілген облыстық, қалалық спорттық додаларға қатысып, жүлделі орындарға ие болып жүрміз. Осы ретте мекеме басшылығы тарапынан алғыс хат, дипломдармен марапатталдым. Өнерге келер болсақ, «Жігітке жеті өнер де аз» демекші, шабытым келгенде қолыма қалам алып, өлең жолдарын жазатыным бар. Көптеген мүшайралардың жеңімпазымын. «Әу» демейтін қазақ жоқ», кей кезде ән айтатыным да бар. Бала күнімде қазақ әдебиетін, оның ішінде жыр-дастандарды сүйіп оқып, талай жыр-терме сайыстарында топ жарғанмын. Оқушылық шақтан бастау алған көп арасынан суырылып шығып, сынға түсу қасиетім студенттік өмірімде де жалғасты. Университет қабырғасында жүргенде де талай байқауларда бақ сынап, жоғары оқу орындар арасында өткен «Жігіт сұлтаны» байқауында сұлтан атанғанмын.
- Өте жақсы, жеңістің тұғырынан таймаңыз. Еңбекте толағай табыстар тілейміз. Сұхбатыңызға рахмет!
Сұхбаттасқан Қаламқас АМАНҚОСОВА
ОСӨСҚПО ЖҚФ еріктісі
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
