©
Жақында ҚР Президенті Нұрсұлтан Назарбаев «Төртінші өнеркәсіптік революция жағдайындағы дамудың жаңа мүмкіндіктері» атты халыққа Жолдауын арнады. Осыған орай, «Достық» үйінде ҚР Парламенті Мәжілісінің депутаты Ахмет Мурадов «Вайнах» этно-мәдени бірлестігінің өкілдерімен кездесіп, Елбасы Жолдауының басты бағыттары мен маңызды міндеттеріне егжей-тегжейлі тоқталып, түсіндірді.
ҚР Парламенті Мәжілісінің табиғатты пайдалану және экология мәселелері бойынша комитетінің мүшесі, Шешен-ингуш мәдениетін дамыту «Вайнах» республикалық бірлестігінің басшысы, Қазақстан Халқы Ассамблеясының мүшесі, Мәжілістің бесінші және алтыншы шақырылымының депутаты Ахмет Мурадов халыққа жаңа стратегиялық маңызды құжаттың мазмұнымен таныстыруды, әрбір бөлімін түсіндірді.
Депутат облыстық «Вайнах» этно-мәдени бірлестігінің өкілдерімен кездесуінде Президенттің Жолдауы – еліміздің өркендеуіне зор серпіліс әкеліп, бірқатар маңызды салаларда оң өзгерістерге жол ашатын басты құжат екенін атап өтті.
- Қазақстан әлемдік деңгейге қарышты қадам басты. Біздің егеменді елімізге БҰҰ қауіпсіздік кеңесіне төрағалық етумәртебесі бұйырды. 25 жыл бұрын Қазақстан тәуелділік бұғауынан босанып, еңсесін енді тіктеп жатқанда мұндай зор мәртебеге жетеді деп кім ойлаған? Бүгінде республикамыз әлемнің алпауыт елдерімен терезесін теңестіріп, бәсекеге қабілетті, озық елдер қатарынан ойып тұрып орын алуда. Ұлан-ғайыр жеріміздің басты қазынасы – бір шаңырақ астында жиналған түрлі ұлт халықтарының бір отбасындай ұйып, тату-тәтті ғұмыр кешуінде. Еліміздің мықты ауызбіршілігі, достығы мен бейбітшілігі – Президентіміздің сұңғыла саясаткер, көреген көшбасшы болуында деп білемін.Қазақстанда өмір сүрген барша халықтардың басты қаруы – оның бірлігі, достығы, біртұтастығы. Сондықтан бейбітшіліктің бесігіне айналған елімізге осындай үлкен мәртебе бұйыруы да заңды, - деп ақтарыла сөйледі депутат А.Мурадов.
Оның сөзінше, өткен жылы Астанада ұйымдастырылған «ЭКСПО-2017» халықаралық көрмесі – миллондаған адамдарды тартып, таңғажайып туындылар мен керемет көріністер ұсынды. Мұндай маңызды ауқымды шара әлемнің назарында болды. «Бұл – еліміздің басты мақтанышы мен абыройы. Қазақстанның берекелі белестерге, жарқын жетістіктерге жетуі, тыныштық пен бейбітшіліктің талбесігіне айналуы Елбасының сындарлы саясатының, қазақ халқының қамқорлығы, жанашырлығы мен даналығының арқасы», - деді ол.
Ахмет Мурадов Жолдаудың ішіндегі 10 басым бағытқа тоқталып, әрқайсысына толық әрі түсінікті мағлұмат беріп өтті. Әсіресе, цифрландыру үрдісі, сыбайлас жемқорлық, мемлекеттік тіл сынды маңызды тақырыптарға ерекше назар аударды.
- Қазақ тілі – мемлекеттік тіл. Қазақстан – діні, ділі, тілі бөлек басқа ұлт өкілдеріне екінші Отанына айналған. Болашақ – қазақ тілінде. Егер болашағымызды осы елмен байланыстыратын болсақ, қазақ тілін меңгеруіміз қажет. Мемлекет бұған барлық жағдай жасаған, - деді Ахмет Сейдарахманұлы. Оның сөзін «Вайнах» этно-мәдени бірлестігінің басшысы Магомед Лорсанов та қостады: «Қазақ тілін білмейтін жастардың болашағы бұлыңғыр».
Халық қалаулысы сөз соңында жиналғандарға Елбасының Жолдауына үн қосып, айқындалған мақсат пен міндеттердің орындалуына үлес қосуға шақырды. «Вайнах» шешен-ингуш этно-мәдени бірлестігінің өкілдері Жолдауға қолдау білдірді.
Ханым ҚУАТ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
