Біз бұған дейін Маңғыстау облысында мектептерге орыс тілі мұғалімдері тапшы екендігі жайлы ақпарат жариялаған болатынбыз.
Мұны Маңғыстау облыстық білім басқармасы растап отыр. Сонымен облыстағы мектептерге барлығы орыс тілінен дәріс беретін 22 мұғалім керек. Атап айтқанда, қазақ тілді мектептерге орыс тілі пәнін жүргізетін мұғалім керек, сонымен қатар орыс тілді мектептерге орыс тілі мұғалімдері қажет-ақ. Бұл туралы облыстық білім басқармасының бақылау кадры бөлімінің басшысы Бақтыгүл Өмірбекова айтып берді.
- Биыл облыстағы колледждерде орыс тілі пәні мұғалімі мамандығында 25 студент бітіреді. Бұған дейін Бейнеуде тәмамдаған математика мұғалімдерін ата-аналарымен сөйлесіп, Мұнайлы ауданы мектептеріне орналастырдық. Биыл ата-аналары келіссе, мұғалім тапшы мектептерге жас мамандар орыс тілі мұғалімі болып, жұмысқа орналаса алады. Сонда ғана зейнетке шыққан орыс тілі мұғалімдерінің орнын жастар баса алады, - дейді Бақтыгүл Өмірбекова.
Бақтыгүл Өмірбекованың айтуынша, облыс бойынша мектептерге 48 мұғалім жеткіліксіз. 2017 жылы қыркүйекте 800-ден жоғары жас маман білім беру мекемелеріне орналасты. Өңірде мектепке дейінгі білім беру ұйымдары, орта мектептер мен техникалық кәсіп беру ұйымдарында барлығы 17 654 мұғалім жұмыс істеп жатыр. Балабақшаға 240 тәрбиеші қажет, бірақ сол мамандықты бітіруі міндетті. Сондай-ақ Ақтау қаласы мектептеріне математика пәнінен орыс тілінде сабақ беретін мұғалімдер де жеткіліксіз болып шықты.
- Былтыр оқу бітірген бастауыш мектеп мұғалімдері жаңартылған бағдарламаны меңгермеген. Олар 1, 2-сынып оқушылары жаңа бағдарламаға көшкендіктен, дәріс бере алмайды. Сол себепті жас мамандар дайындық сыныбына ғана орналастыра алдық, 3-сыныптарға дәріс беруіне ата-аналар тәжірибесіз деп қарсылық танытты. Жұмысқа орналастыруда осындай кедергілер болды. Дегенмен биыл облыстағы колледждерде бітіретін бастауыш сынып мұғалімдерінің барлығы жаңартылған бағдарламаны меңгеріп шығады, - дейді Бақтыгүл Өмірбекова.
Биыл бітіруші түлектер мен олардың ата-аналарына кеңес, өлкемізде қазақ тілі, география, ағылшын тілі, қазақ тілінде бастауыш сыныптарына сабақ беретін жас мамандар өте көп. Сол себепті мамандықты таңдарда жұмысқа кіру мәселесін де ойланған жөн.
Айгүл ДӘДЕН
Суреттер интернет беттерінен алынды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
