Ақтауда конкурстық комиссиядан өтпей қалған бір топ ұстаз наразылық білдіріп жатыр. Олардың видеосы әлеуметтік желіде тарап кетті, - деп хабарлайды mangystaumedia.kz сайты.
Жақында ұстаздар қалада жаңадан ашылған №30 мектепке жұмысқа орналасу үшін конкурсқа түсті. Аталған конкурстан өтпей қалған мұғалімдер шағымданып, комиссияның әділ болмағанын айтады.
Алайда Ақтау қаласының білім бөлімінің мамандары конкурстың тиісті ережеге сай өткенін хабарлайды. Ақтау қалалық білім бөлімінің мәліметінше, конкурсқа 844 үміткер құжат тапсырған. Оның ішінде 153 педагог жұмысқа қабылданған.
«Комиссия конкурстан өтпеген педагогтермен түсіндіру жұмыстарын жүргізді. Конкурс "Мемлекеттік білім беру ұйымдарының бірінші басшылары мен педагогтерін лауазымға тағайындау, лауазымнан босату қағидаларын бекіту туралы "Қазақстан Республикасы Білім және ғылым министрінің 2012 жылғы 21 ақпандағы № 57 Бұйрығына сәйкес жүргізілді.
Комиссия төрайымы Ақтау қаласы бойынша оқу әдістемелік орталығының директоры болды. Құрамында Маңғыстау облысының білім саласындағы сапаны қамтамасыз ету департаментінің, Маңғыстау «Адалдық алаңы» жобалық кеңсесінің, облыстық кәсіподақ ұйымының, Ақтау қаласы бойынша білім бөлімінің, №13 гимназия директоры мен №28 жалпы білім беретін орта мектеп директорының оқу-ісі жөніндегі орынбасары болды», - делінген хабарламада.
Видеодан кейін желідегі жандардың пікірі екіге жарылды. Бірі конкурстық іріктеудің әділ болғанын айтса, енді бірі мұндай конкурс оқу бітіріп келген жас мамандардың жұмысқа орналасуына кедергі келтіретінін айтқан.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
