Маңғыстау облысы бойынша экономикалық тергеу департаменті агенттігінің бөлімшелері қаржы пирамидаларына қатысты 3 мыңнан аса интернет сайттарды бұғаттады. Оның ішінде 201-і Маңғыстау облыстық департаменті тарапынан бұғатталған, деп хабарлайды mangystaumedia.kz.
Бұл туралы Маңғыстау облыстық прокуратурасында өткен баспасөз жиынында айтылды.
Азаматтардың 19 арызы бойынша департамент қаржы пирамидаларына қатысты тергеу жүргізіп, 651 миллион теңге қаржы көлеміндегі мүлікті тәркілеген.
Бұдан басқа қаржы пирамидаларына қатысты жарнама үшін жауапкершілікті көздейтін Қылмыстық Кодекске өзгерістер енгізілген. Өзгеріс биыл шілдеде заңды күшіне еніп, қаржы пирамидаларын жарнамалаған азамат қылмыстық жауапкершілікке тартылады. Яғни 200 АЕК 6 миллион 360 мың теңгеге дейін айыппұл арқалайды немесе 600 сағатқа дейінгі қоғамдық жұмыстарға әлде екі жылға дейін бас бостандығынан шектеу түрінде жазаланады.
Егер жарнаманы ұйымдастырушының қылмыстық ниеті анықталса, мүлкі тәркіленіп, үш жылдан жеті жылға дейін бас бостандығынан айыру түрінде жазаланады.
- Қаржы пирамидасын ұйымдастырушылар азаматтарды перспективалық коммерциялық жоба, қаржылық инвестиция және басқа да кәсіпкерлік түрлерімен алдайды, халықтың ақшасын иеленеді. Азаматтарды тартудың ең көп тараған тәсілдерінің бірі –жылжымайтын мүлікті немесе автокөлікті құнының жартысын ғана салып, сатып алу болмақ. Ал қалған бөлігін пирамида төлеп беріп, азамат бірнеше жыл ішінде пайызсыз қайтарады деп ұсынады. Азамат жарты қаржысын бірден беруге, ал пирамида бірнеше айдан кейін құнның екінші жартысын төлеп беруге міндеттеме алғанымен, орындамайды. Өз пиғылына жету үшін мұндай қаржы пирамидасыының ұйымдастырушылары жарнамаға қаражат аямайды. Салымшылармен жеке кездесулер, түрлі сыйлықтар мен ұтыс ойындар өткізеді. Пирамдаларды инвестициялық компания, биржа, кооператив деп жасырады, - дейді Маңғыстау облысы бойынша экономикалық тергеу департаменті басшысының орынбасары Балнұр Есенгелдинов.