Ақтауда жаңа оқу жылында 7 мектеп пайдалануға берілді, деп хабарлайды mangystaumedia.kz Қоғамдық коммуникация орталығына сілтеме жасап.
Ақтау қалалық білім бөлімінің басшысы Бағдат Тұрғанбаеваның айтуынша, білім күні Ақтау қаласының оқушылары үшін 7 жаңа мектеп есігін айқара ашты. 1 мемлекеттік мектеп, 6 жеке мектеп демеушілер есебінен.
Айта кету керек, өңірдің барлық мектептері жаңа оқу жылының басталуына дайындыққа тексеруден өтті.
Ақтау қаласы бойынша білім бөлімі 2022-2023 оқу жылын 28 мемлекеттік жалпы білім беретін және 18 жеке меншік, 1 кешкі мектептен бастады. 11-сыныпқа дейінгі барлығы 57 200 оқушының 6750-і бірінші сыныпқа қабылданды.
31«А» ықшам ауданындағы №30 орта мектептің ашылу салтанатына Маңғыстау облысы әкімінің бірінші орынбасары Бекбол Орынбасаров, «Amanat« ЖҚБ атқарушы хатшысы Нұрбек Қарасаев, Ақтау қаласының әкімі Нұрдәулет Қилыбай, Маңғыстау облысы білім басқармасының басшысы Динара Жұмашева қатысты.
Айта кетейік, 1200 орындық мектеп 3 га алаңда орналасқан және заманауи жабдықтармен жабдықталған. Мұнда 256 орындық акт залы, 120 адамға арналған асхана, 10 орындық оқу залы бар кітапхана, спортзал, сондай-ақ арнайы жабдықталған оқу кабинеттері бар-барлығы 48 сынып. Сондай-ақ, төменгі сынып оқушылары оқулықтар, аяқ киім және спорттық керек-жарақтарға арналған шкафтармен қамтамасыз етілді.